Almaty qalasynda bıyl úleskerlerdiń máselesi tolyq sheshiledi degen senim bar - Ó.Shókeev
ALMATY. 19 tamyz. QazAqparat /Ádilet Musahaev/ - Búgingi tekserý jumystaryn qorytyndylaıtyn bolsaq, Almaty qalasynda bıyl úleskerlerdiń máselesi tolyq sheshiledi degen senim bar, oǵan kózimiz jetip otyr.
Bul jaıynda QR Premer-Mınıstriniń birinshi orynbasary Ómirzaq Shókeev Almatyǵa jumys sapary barysynda aıtty.
Ó.Shókeev 2007 jyly álemdik ekonomıkalyq daǵdarys bastalǵan kezde elimizdegi 450 qurylys toqtap qalǵandyǵyn jáne óz qarjysyn salǵan 62 myńnan astam úlesker óte aýyr jaǵdaıda qalǵandyǵyn aıtyp ótti. Sodan beri Úkimet úleskerlerdiń máselesin sheshý baǵdarlamasyn iske asyrylyp kele jatyr, oǵan 7-8 mehanızm kiredi. «Qazir sol baǵdarlamanyń nátıjesinde 57 myńnan astam úlesker óz páterlerin aldy, qalǵan 5-6 myń úleskerdiń máselesin bıyl sheshýge tyrysyp jatyrmyz», -deıdi ol.
Sonymen qatar Ó.Shókeev Almaty oblysyndaǵy úleskerlerdiń jaǵdaıy sál qıyndaý ekendigin jetkizdi. «Almaty mańynda 7-8 iri kompanııa úleskerlerdiń senimin paıdalanyp, qarjylaryn jınap, tipten jumysty bastamaǵan alaıaq kompanııalar kóp boldy. Osy máselemen ákimshilik jete aınalysyp, buryn-sońdy qoldanylmaǵan tásilder paıdalanyldy. Máselen, 6 kompanııanyń úleskerlerin bir jerge shoǵyrlandyryp «Premera» degen iri nysan salynýda. Bul jerde 2111 úlesker óz páterin alady, bıyl tolyqtaı bitirmesek te, ár úlesker óz páterin óńdeý jumystarynsyz kóre alatyndyǵyna kózimiz jetip otyr. Kelesi jyldyń mamyr aıyna deıin bul úılerdi tolyqtaı bitirip, úleskerlerge tabystaımyz», -dep atap ótti Ó.Shókeev.
