Almaty qalasynda birqatar alaıaqtyq áreketteri úshin ustalǵan kúdiktiler ustaldy
ASTANA. 19 qańtar. QazAqparat - Almaty qalasy ІІD krımınaldyq polıtsııa qyzmetkerleri Bostandyq aýdany aýmaǵynda birqatar alaıaqtyq áreketter istedi degen kúdikpen eki jas kelinshekti «izin sýytpaı» qolǵa túsirdi.
Bul týraly QR ІІM baspasóz qyzmeti habarlady.
15 qańtar kúni polıtsııaǵa zeınetkerge qatysty alaıaqtyq áreketter jasamaq bolǵan eki kelinshektiń ustalǵany týraly aqparat kelip túsken. Oqıǵa barysyn teksere kele ózderin qalalyq emhanalardyń biriniń medbıkeleri dep tanystyrǵan eki kelinshek 83 jasar ájeıdiń senimine qııanat keltirip, páterine engendigi belgili bolǵan. Seziktiler ájeıdiń azyn-aýlaq aqshasyn qoldy qylmaq bolǵanda alaıaqtardyń qıturqy oıyn sezip qalǵan jábirlenýshi daýystap kómekke shaqyra bastaǵan. Qasyndaǵy páterden janjal shyǵyp jatqanyn estip qalǵan kórshisi ájeıdiń páteriniń esigin syrtynan jaýyp tastap, dereý polıtsııaǵa habarlaǵan.
Oqıǵa ornyna kelip jetken polıtseıler ustalǵan azamatshalardyń 17 jáne 20 jasar Almaty oblysy Jambyl aýdanynyń turǵyndary ekendigi anyqtady.
Jedel-tergeý is-sharalaryn júrgizý barysynda Almaty qalasy Bostandyq aýdanynda turatyn taǵy 6 zeınetker atalmysh alaıaqtarǵa jem bolǵandyǵy anyqtalyp otyr. Qaskóıler aram pıǵyldaryn júzege asyrmaqqa qalaǵa kelip, qylmystyq áreketterin jasaǵan soń úılerine qaıtyp otyrǵan. Olar qańtar aıynyń basynan qylmystyq jolmen zeınetkerlerdiń 100 myń teńgesin qoldy qylǵan.
Kúdiktiler qazirgi kezde jasaǵan qylmystaryn tolyǵymen moıyndap, olardyń biri ýaqytsha ustaý abaqtysyna qamaýǵa alynǵan. Jedel ýákilder kúdiktilerdiń osyǵan uqsas basqa da qylmystarǵa qatystylyǵyn tekserip jatyr. Sondaı-aq, polıtseıler atalǵan alaıaqtardyń aldaýyna túsken basqa da jábirlenýshilerdi anyqtaý ústinde.
