Almaty qalasynda birinshi Tomosıntez ortalyǵy ashyldy
ALMATY. QazAqparat – Almatda tomosıntez ortalyǵy ashyldy. Bul joba QR DSM «Qazaq onkologııa jáne radıologııa» ǵylymı-zertteý ınstıtýttymen birlesip, memlekettik-jekeshelik áriptestik sheńberinde júzege asyrylady, dep habarlady QazAqparat tilshisi.
Jańa Divera tomosıntez ortalyǵy eń zamanaýı Fujifilm Amulet Innovality apparatymen jabdyqtalǵan jáne qazirgi ýaqytta Almaty qalasynda jalǵyz tomosıntez ortalyǵy. Ortalyqty qurý jáne ony jabdyqtaý tolyǵymen jeke ınvestıtsııa esebinen júzege asyryldy.
«Tomosıntez – sút bezi obyryn (SBO) dıagnostıkalaýdyń ınnovatsııalyq ádisi. Qalypty 2D-mammografııadan aıyrmashylyǵy, tomosıntez ár túrli buryshtaǵy juqa qabatty sýretter shyǵarady, bul sút bezi obyryn erte kezeńderde joǵary jáne dál anyqtaýǵa jáne patsıentterdiń ómirin saqtaýǵa múmkindik beredi», - deıdi «Qazaq onkologııa jáne radıologııa ǵylymı-zertteý ınstıtýty» AQ basqarma tóraıymy Dılıara Qaıdarova.
Onyń aıtýynsha, bul apparattyń mammografııadan artyqshylyǵy – 1 mm ólshemde, ıaǵnı mıllımetrlep sút bezi obyryn anyqtaıdy. Jáne tomosıntezge túsirip jatqan kezde bıopsııany da qosa júrgizýge múmkindik bar. Buryn mammograf sút bezi obyrynyń belgileri bolsa naýqastyń bulshyq etin alý úshin emhanalarǵa, hırýrgke jiberetin. Endi qazir qajet bolǵan jaǵdaıda dıagnostıkamen bıopsııa da qosa jasalady.
Tomosıntezdiń kómegimen SBO dıagnostıkalaý ádisteri Eýropada, AQSh-ta, Koreıada jáne Japonııada nátıjeli qoldanylady.
Sút bezi obyry – álemde eń keń taraǵan qaterli aýrý jáne áıelder arasyndaǵy ólim-jitimge sebepshi bolady. Qazaqstanda sút bezi obyry áıelderdiń onkologııalyq aýrýshańdyǵy qurylymynda birinshi orynda tur.
Іsikaldy jáne isik patologııalaryn erte anyqtaýǵa baǵyttalǵan júıeli túrde júrgiziletin skrınıng, emdik taktıkany ýaqtyly dıagnostıkalaý jáne standarttaý elimizde sút bezi obyrynan ólim-jitim deńgeıin tómendetýge múmkindik beredi.
