Almaty qalasyna týyndaýy múmkin qaýiptiń der kezinde sheshimin tabý kerek - depýtat Z. Bálıeva
ASTANA. Mamyrdyń 12-si. QazAqparat /Qanat Mámetqazyuly/ - Tótenshe jaǵdaılar mınıstrligi Almaty qalasyna týyndaýy múmkin qaýipti der kezinde sheshýi qajet. Búgin QR Parlamenti Májilisiniń jalpy otyrysynda Úkimet basshysy men Tótenshe jaǵdaılar mınıstriniń atyna saýal joldaǵan depýtat Zaǵıpa Bálıeva osylaı málim etti,
dep habarlaıdy QazAqparat.
«Almaty qalasyn qorshap jatqan taýdyń tóbesinde ǵalymdar tilinde «№6-shy» dep atalatyn kól bar. Osy №6 balshyqty kóliniń búgingi jaǵdaıy úlken alańdaýshylyq týdyryp otyr. Óıtkeni, bizge jetken málimetterge qaraǵanda, atalmysh kólge jınaqtalǵan muz sýy qalaǵa zor qaýip tóndiredi. Eger 1973 jyly Medeý shatqalyndaǵy bóget 4,5 mln. tekshe metr laı tasqynyn toqtatqan bolsa, №6 kólde muzdyqtar erýinen jınaqtalǵan sýdyń tereńdigi 23 metrden asqan. Ǵalymdardyń paıymdaýynsha, laıly batpaqtyń jınalǵan aýqymy burynǵydan eki esege deıin asyp otyr», dedi depýtat.
Osyǵan oraı, Z. Bálıeva atalmysh kólden týyndaıtyn qaýiptiń aldyn alý sharalary áli de jetkiliksiz ekendigin aıtty. «Osy kólge qatysty 1921 jyly, 1963 jáne 1973 jyldary oryn alǵan oqıǵalardy, sondaı-aq «Qyzylaǵash» apatyn esten shyǵarmaýǵa tıispiz», degen depýtat Tótenshe jaǵdaılar mınıstrin Májiliste aýyzsha jaýap berýge shaqyrdy.
