Almaty qalasyna oblys turǵyndary qashan kire alady
ALMATY. QazAqparat – Oblystaǵylar Almatyǵa tek karantın bitken soń ǵana kire alady. Bul týraly Almaty ákiminiń birinshi orynbasary Erlan Qojaǵapanov onlaın brıfıngide aıtty, dep habarlaıdy QazAqparat tilshisi.
«Oblystaǵylar qalaǵa karantın rejimi aıaqtalǵannan keıin ǵana kire alady. Onyń qashan aıaqtalatynyn eshkim bilmeıdi. Ókinishke oraı, qazir elimizdiń barlyq óńirinde koronavırýs indetin juqtyrǵandar sany ósip keledi. Olardyń qatarynda Almatyda bar. Sondyqtan naqty aıta almaımyz», - deıdi Almaty qalasy ákiminiń birinshi orynbasary Erlan Qojaǵapanov.
Sondaı-aq, ol Almatyda elimizdiń basqa óńirinen kelip jumys istep jatqan adamdardyń ketýge májibúr bolǵanyn aıtty.
«Kóptegen azamat Almatyda jumys istep, kúneltip júrdi. Ózderińiz bilesizder Memleket basshysy tabysynan aıyrylǵan adamdardyń barlyǵyna kómek kórsetýdi tapsyrdy. Bul 3 mıllıonnan astam adam. Olardyń barlyǵyna bir rettik kómek kórsetiledi. Kóptegen kásiporyndar úshin jeńildikter qarastyryldy. Bul sharalardyń barlyǵy turaqtylyqty saqtaý úshin jasaldy. Meniń oıymsha, biz bul synaqty birge ótemiz jáne bizde bári jaqsy bolady», deıdi Erlan Qojaǵapanov.
