Almaty qalasy men oblysyndaǵy ózenderdiń sý deńgeıi kóterilýi múmkin
NUR-SULTAN. QazAqparat – Qazgıdromet 5 mamyrda birqatar óńirde aýa raıyna baılanysty eskertý jarııalady, dep habarlaıdy QazAqparat.
Mańǵystaý oblysynyń ońtústiginde, batysynda, ortalyǵynda naızaǵaı jarqyldaıdy. Oblystyń soltústiginde, shyǵysynda shańdy daýyl kútiledi. Jel 15-20 m/s jyldamdyqpen soǵady.
Túnde jáne tańerteń Aqtóbe oblysynyń soltústiginde tuman túsedi.
Túrkistan oblysynyń ońtústiginde, taýly jáne taý bókterli aýdandarynda naızaǵaı jarqyldap, daýyl soǵady.
Shymkent qalasynda daýyl kútiledi. Naızaǵaı jarqyldap, batystan soqqan jel ekpini 15-20 m/s jetýi yqtımal.
Kúndiz Aqmola oblysynyń soltústiginde, ońtústik-shyǵysynda naızaǵaı kútiledi. Jel 15-20 m/s jyldamdyqta bolady.
5 mamyrda tańerteń jáne kúndiz Pavlodar oblysynyń batysynda, soltústiginde naızaǵaı jarqyldaıdy.
Qostanaı oblysynyń shyǵysynda, soltústiginde naızaǵaı kútiledi. Ońtústik-batystan jel soǵady, kúndiz oblystyń shyǵysynda, soltústiginde ekpini 15-20 m/s bolady.
Batys Qazaqstan oblysynda jel ońtústik-batystan soǵady, kúndiz oblystyń soltústiginde, ortalyǵynda jeldiń ekpini 15-20 m/s jetedi.
Taýly óńirlerge qatty jaýyn-shashyn boljamyna baılanysty 5-6 mamyr aralyǵynda Almaty oblysy men Almaty qalasy mańyndaǵy taýly aýdandaryndaǵy ózenderdiń sý deńgeıi kóterilýi múmkin.
Almaty qalasynda qatty jańbyr, burshaq kútiledi. Soqqan jeldiń jyldamdyǵy 15-20 m/s jetedi.
