Almaty qalasy ІІD jańa jyl qarsańynda úıge túsetin urylar kóbeıetindigin eskertti
ALMATY. QazAqparat - Jańa jyl merkesi qarsańynda páter tonaý qylmysy kóbeıedi. Almaty qalasy Іshki ister departamenti urlyqtyń aldyn alý úshin birqatar keńester berdi, dep habarlaıdy QazAqparat.
ІІD-niń resmı ókili Saltanat Ázirbek eń aldymen esikke myqty qulyp ornatý qajettigin aıtady. Sodan keıin, merekelik sharalarǵa ketkende kiltti otbasy múshelerinen bólek jandarǵa qaldyrmaý qajet.
Sonymen qatar, Saltanat Ázirbek qala turǵyndary áleýmettik jelilerge demalysqa shet elge ketip bara jatqanyn jarııalaı otyryp, urylardy ózderi «shaqyratynyn» da eskertke ketti. Buǵan qosa, polıtseıler urylar áleýetti «qurbandaryn» áleýmettik jeliler arqyly qatań baqylap otyrady degen ustanymdy alǵa tartyp otyr.
«Árıne, eń durys dabyl dybysyn ornatý. Bul eń jaqsy qaýipsizdik quraly. Tájirıbeden aıtar bolsaq, onyń kómegi kóp. Bul oraıda, árıne, turǵyndardyń barlyǵyna «ornatyńdar» dep te aıta almaımyz. Eń bastysy urlyq eńbek demalysyna ketkende jáne jańa jyldyq demalysta úıdi ıesiz qaldyrǵanda bolatynyn umytpaıyq», - deıdi S.Ázirbek.
Saltanat Ázirbek bótenniń múlkin urlaǵandar zań aldynda QR QK 188-baby boıynsha qylmystyq jazaǵa tartylatynyn eskertti.
