Almaty qalasy ákimdigine aqyly kólik qoıýdy uıymdastyrýǵa baılanysty 120-dan astam usynys tústi

Esterińizge sala ketsek, qala ákimdigi jaqynda almatylyqtarǵa aqyly kólik qoıýdy uıymdastyrý boıynsha usynys-ótinishterdi qabyldaıtyndyqtaryn aıtqan edi.

Qazirgi kezde aqyly avtoturaqtardy uıymdastyrýdyń ereje - jobasy jemqorlyqqa qarsy kúres saraptamasynan ótýde. Atalǵan joba barlyq usynystar men eskertýler, sonyń ishinde qala ákimshiliginiń resmı ınternet-resýrsyna joldanǵan almatylyqtardyń da usynystaryn eskerip, tolyqtyryldy. Usynystar kóbine kólik qoıý úshin tólem, tólem mehanızmi jáne de kólik qoıatyn oryndardyń ornalasýy, uıymdastyrý joldaryna baılanysty boldy. Almaty qalasynyń Tabıǵat resýrstary jáne tabıǵatty paıdalanýdy retteý basqarmasy qalalyq qyzmettermen birlesip, osy erejelerdegi mehanızmderdi Almatyǵa sáıkestendirip, sheteldik tájirıbege súıenip jasaýda.

Negizinen bul joba Almaty qalasynyń aqyly kólik qoıýdy uıymdastyrý erejeleriniń Jer kodeksi men «Almaty qalasynyń erekshe mártebesi» týraly zańǵa kólik qoıý aımaǵynyń tutas saıasatyn qurý, kólik qoıý boıynsha sapaly qyzmet kórsetýge múmkindik jasaý, jol júrisiniń qaýipsizdigin qamtamasyz etý, kóshe-jol toraptarynyń ótkizý múmkindigin ulǵaıtý, qorshaǵan ortanyń lastaný deńgeıin tómendetýge baılanysty ózgertýler engendikten jasalynyp jatyr.

Jaqynda Almaty qalasynyń ákimi Ahmetjan Esimov atalǵan erejelerdi jasaýǵa baılanysty ótken keńeste, kólik qoıýdy retteý úshin jobanyń bastamasyn osy jyly júzege asyrý kerektigin atap ótip, atqarýshy mekemelerdi anyqtaý úshin tender ótkizý qajet ekendigin habarlaǵan bolatyn. Onda ol sonymen qatar, «Bizdiń artyqshylyǵymyz osy jobany jańadan taza paraqtan bastap jatqandyǵymyz. Sondyqtan barlyq mehanızmderdi jaqsy oılastyryp, ınvestorlar men kólik ıeleriniń de jáne basqa da usynystar men qalaýlardy eskerý kerek. Jáne de atqarýshy mekemelerdiń erejeni saqtamaǵan jaǵdaıda olarmen kelisimsharttyń buzylatyndyǵyn erejede naqty jazý qajet»,- dedi.

Joba osy jyldyń qarasha aıynyń basynda bekitýge berilýi tıis.