Almaty qalalyq TJD: Sel qaýpi bolǵan aımaqta 500-den astam nysan ornalasqan
ALMATY. QazAqparat – Almaty qalalyq TJD basshysynyń orynbasary Erlan Álibekov selden japa shegýi yqtımal osal aýdandardy atady, dep habarlaıdy QazAqparat tilshisi.
«Aýa temperatýrasynyń sońǵy eki aıda tómendemeýine baılanysty tańǵy saǵat 6:20-lar shamasynda Qarǵaly ózeni basseınindegi №1 morenalyq kóldiń sýy bosatyldy. Sekýndyna 5 tekshe metr jyldamdyqpen jiberilgende kóldegi sý deńgeıi 5 metrge tómendedi. Bastapqy esepteý boıynsha 20 myń tekshe metr sý aǵyzylǵan. Qazir alańdaýǵa negiz joq. Halyqty ábigerge salmas úshin biz tek Qarǵaly ańǵarynda ornalasqan dybys zoraıtqyshtar arqyly habarlama jiberdik. Basqa aýdan turǵyndaryna múlde qaýip joq. Qaýip aımaǵynda 564 nysan ornalasqan. Jalpy sany 1 864 adam turady. Barlyq osal 8 ýchaske Qarǵaly plotınasynan T.Rysqulov kóshesine deıingi aımaqta ornalasqan», - dedi Erlan Álibekov.
Sonymen qatar, onyń aıtýynsha, basqa tańdaǵy moren kólderinde ahýal turaqty.
«Almaty mańynda barlyǵy 7 muz kóli bar. Olarda prıventıvti sharalar qolǵa alynyp jatyr. Basqa 6 kól №1 moren kóli sııaqty qaýipti emes. Bul kólder statsıonarly. Olarda evakýatsııalyq kanaldar qazylǵan. Sý tranzıt bolyp ótip ketedi. Eń qaýipti sanalatyn №13 kólde sý deńgeıi jyl basynan beri 4 metr 6 sm tómendedi. Basqa muz kólderinen halyqqa tóngen qaýip joq», - dedi ol.
Aıta ketý kerek, búgin Almatyda Naýryzbaı aýdanynda az mólsherde sel júrgen bolatyn. TJD ókilderi halyqty qulaqtandyryp úlgerdi. Qala ákimi Baqytjan Saǵyntaev oqıǵa ornyna shuǵyl kelip jetti.
Qalalyq TJD ókilderi Qarǵaly ózenindegi búgingi ahýal jóninde málimetti jarııa etti.
