Almaty qalalyq sot ǵımaratynyń qurylysyna 1 mlrd teńge bólinedi

ALMATY. QazAqparat - Almaty máslıhatynyń kezekti sessııasynda qala bıýdjetin qaıta qaralyp, únemdelgen qarajat mańyzdy baǵyttarǵa qaıta bólinetin boldy, dep habarlaıdy QazAqparat tilshisi.

«Qala aýmaǵynyń abattandyrylýy men kóriktendirilýi azamattar qaýipsizdigimen tikeleı baılanysty. Osy maqsatta polıtsııa men qoǵam arasyndaǵy senim men baılanysty nyǵaıtý úshin Polıtsııa departamenti bólshimsheleriniń front-ofısterin ashýǵa - 176 mln teńge, qalalyq sot ǵımaratynyń qurylysyn jalǵastyrýǵa - 1 mlrd teńge qarastyrylmaq. Sonymen qatar, avtobýs jolaǵyndaǵy jol erejesin buzý faktilerin tirkeý úshin fotofıksatsııa júıesin jetildirýge 105 mln teńge baǵyttalmaq», - dedi qalalyq ekonomıka jáne bıýdjettik josparlaý basqarmasynyń basshysy Іlııas Óserov.

Bıyl qalany kóriktendirýge 372,3 mln teńge jumsalady. Onyń ishinde Nazarbaev dańǵylynyń Raıymbek dańǵylynan Abaı kóshesine deıingi bóliginde jaıaý júrginshi aımaǵyn aıaqtaýǵa 278,7 mln teńge, qala kóshelerin tazalaýǵa 69,6 mln teńge qarastyrylady.

Osylaısha Almaty bıýdjeti 537,5 mlrd teńge bolmaq. Onyń ishinde naqty bıýdjet  - 434,6 mlrd teńge.