Almaty qalalyq qoǵamdyq keńesiniń quramy qaıta jańarady

ALMATY. QazAqparat- Almaty qalalyq qoǵamdyq keńesiniń quramy qaıta jańarady. Bul týraly máslıhattyń baspasóz qyzmeti málim etti, dep habarlaıdy QazAqparat tilshisi.

Búgin osyǵan oraı keńestiń jumys toby arnaıy otyrys ótkizdi.

Jıyn barysynda jańa quramǵa enetin kandıdattardan qujat qabyldaý ýaqyty men úmitkerlerge qoıylatyn talaptar belgili boldy.

Qoǵamdyq keńes ókili bolǵysy keletin azamat tıisti qaǵazdardy qalalyq máslıhatqa, 6 sáýir men 19 sáýir aralyǵynda ótkize alady.

Osydan keıin on jumys kún ishinde kandıdattardy saılaý júrgiziledi.

Keńes quramyna 36 qoǵam belsendisi jáne 3 memlekettik orǵan ókili iriktelip alynady.

Kommertsııalyq emes uıymdardyń ókilderi men azamattar kórsetilgen merzim aralyǵynda kelesi qujattardy tapsyrady:

1) Qoǵamdyq keńestiń quramyna óz kandıdatýrasyn usyný týraly azamattyń ótinishi;

2) kandıdatýrany Qoǵamdyq keńestiń quramyna usyný týraly kommertsııalyq emes uıymnyń jazbasha usynysy (bolǵan jaǵdaıda);

3) ómirbaıan derekteri kórsetile otyryp, kandıdattyń kásiptik jáne (nemese) qoǵamdyq qyzmeti týraly málimetter;

4) sottalmaǵany týraly anyqtama;

5) psıhıkalyq, minez-qulyqtyq, onyń ishinde psıhıkaǵa belsendi áser etetin zattardy tutynýǵa baılanysty buzylýshylyqtardyń (aýrýlardyń) bolmaýy týraly anyqtama usynylady.

Kandıdattar mynadaı jaǵdaılarda konkýrsqa jiberilmeıdi:

1) qujattar toptamasyn ýaqtyly nemese tolyq usynbaý;

2) dáıeksiz aqparatty qamtıtyn qujattardy jáne (nemese) málimetterdi usyný;

3) «Qoǵamdyq keńester týraly» QR Zańnyń 10-babynyń 3-tarmaǵynda belgilengen talaptarǵa saı kelmeıtin kandıdattar.

Qoǵamdyq keńes quramyn azamattyq sektor, saıası partııa ókilderinen, kásipodaqtyq, múmkindigi shekteýli azamattar men ardagerler, kásipkerler men zańgerlerden jasaqtalǵan jumys toby anyqtaıdy.

Kandıdattar tolyq aqparatty «Almaty aqshamy» gezeti men máslıhat saıtynan bile alady.