Almaty qalalyq qoǵamdyq densaýlyq saqtaý departamenti basshysynyń orynbasary qyzmetinen bosatyldy
ALMATY. QazAqparat – Almaty qalasynyń Ádep jónindegi keńesiniń sheshimimen Almaty qalalyq qoǵamdyq densaýlyq saqtaý departamenti basshysynyń orynbasary Laýra Myrzaǵalı tártiptik jaýapkershilikke tartylyp, memlekettik qyzmetten bosatyldy, dep habarlaıdy QazAqparat tilshisi.
«Almaty qalasynyń Ádep jónindegi keńesiniń sheshimimen memlekettik qyzmet bedeline nuqsan keltiretin teris qylyq jasaǵany úshin Almaty qalasynyń Qoǵamdyq densaýlyq saqtaý departamenti basshysynyń orynbasary Laýra Myrzaǵalı tártiptik jaýapkershilikke tartyldy (memlekettik qyzmetke úsh jyl ishinde jumysqa kirýge tyıym salynady) jáne qazirgi ýaqytta memlekettik qyzmetten bosatyldy», - delinedi qalalyq ákimdiktiń baspasóz qyzmetiniń habarlamasynda.
Eske salsaq, buǵan deıin Laýra Myrzaǵalıdi qyzmetinen bosatý týraly sheshim qabyldaǵanyn, biraq, jumysynan áli bosatylmaǵanyn jazǵanbyz.
Sondaı-aq densaýlyq saqtaý basqarmasynyń basshysy sheshimdi 10 jumys kúni ishinde (20 mamyrǵa deıin) qabyldaýy kerek bolǵanyn jáne áleýmettik jelilerde Laýra Myrzaǵalıdyń qyzmetkermen syıaqy týraly sóz talastyrǵan vıdeo taraǵany, keıin Memlekettik qyzmet isteri agenttiginiń Almaty qalasy boıynsha departamenti dáriger Laýra Myrzaǵalıǵa qatysty tekserý bastalǵanyn málim etkenin habarlaǵan bolatynbyz.
