Almaty qalalyq klınıkalyq aýrýhanasynan koronavırýspen aýyrǵan sońǵy naýqas emdelip shyqty
ALMATY. QazAqparat – 21 tamyzda №4 qalalyq klınıkalyq aýrýhanasynyń juqpaly aýrýlar bólimshesinen koronavırýspen aýyrǵan sońǵy emdelýshi úıine shyqty, dep habarlaıdy QazAqparat tilishsi.
«№4 qalalyq klınıkalyq aýrýhanasynyń juqpaly aýrýlar bólimshesine dezınfektsııalyq jumystar júrgiziledi. Medıtsınalyq qyzmetkerler eki aptalyq oqshaýlanýǵa ketedi, sodan keıin ózderiniń beıindi bólimshelerine burynǵy jumysyntaryna oralady»,– dep habarlady Almaty qalalyq qoǵamdyq densaýlyq saqtaý basqarmasynan.
Búgin «tórttik» statsıonarynan COVID-19 vırýsynan aıyqqan sońǵy naýqas Jumaádil Aqymbekov úıine shyǵaryldy.
«Mende aýa jetispeýshiligi, qurǵaq jótel, álsizdik jáne entigý boldy. Bir apta boıy dene qyzýym 39,8°C-qa deıin kóterilip, keýde tusym qatty aýyrdy. Men aýrýhanaǵa ózim keldim. Maǵan KT jasap dereý aýrýhanaǵa jatqyzdy. Maǵan eki jaqty polısegmenttik pnevmonııa dıagnozy qoıyldy. Munda maǵan bala sııaqty qamqorlyq tanytyp, emdedi. Dárigerler men medbıkeler árdaıym janymda boldy. Eki aptadan keıin qaıtadan ıis, dám seze bastadym. Qazir jaǵdaıym jaqsy. Úıge shyǵardy. Bul aýrýmen eshkim aýyrmasa eken dep tileımin», – deıdi Jumaádil Aqymbekov.
Patsıent eki aptalyq úı karantınine jiberildi, al №4 qalalyq klınıkalyq aýrýhanasynyń juqpaly aýrýlar bólimshesine dezınfektsııalyq jumystar júrgiziledi.
2020 jyly 24 maýsymda Almaty qalasy Qoǵamdyq densaýlyq basqarmasy men Taýarlar men kórsetiletin qyzmetterdiń sapasy men qaýipsizdigin baqylaý departamentiniń birlesken buıryǵy negizinde №4 QKA-da 25 tósek-orny bar juqpaly aýrýlar bólimshesi ashyldy, sol kezde josparly medıtsınalyq kómek kórsetý toqtatyldy, fızıoterapııa jáne ońaltý bólimshesin qaıta beıindeý esebinen kovıdtik bólimshesi quryldy. Klınıkanyń eriktileri qatarynan 44 adamnan turatyn medıtsınalyq qyzmetkerler alyndy.
«Jańa juqpaly aýrýlar bólimshesine jumysqa qabyldaý týraly habarlamadan soń kópshiligi oılanbastan ótinish berdi. Bastapqyda 14 dáriger jumys istedi, onyń ishinde 4 reanımatolog, qalǵan 10 dáriger qurama komanda: travmatolog, ınfektsıonıst, terapevt, reabılıtolog dáriger, FGDS dárigeri, ÝDZ dıagnostıkasy bar. Qalǵany medbıkeler men sanıtarlar, sondaı-aq eriktiler. Bólimshede 25 tósek-orynǵa jáne 5 reanımatsııalyq orynǵa eseptelgen, aýrý órshigen shaqta shyndyǵynda 70-ke deıin aýyr naýqas jatty», - dep eske alady juqpaly aýrýlar bólimshesiniń meńgerýshisi Nurjan Baıbahov.
