Almaty qalalyq QHA qaza tapqandardyń otbasylaryna materıaldyq qoldaý kórsetti
Іs-sharaǵa QR Parlamenti Májilisiniń depýtaty Narıne Mıkaelıan, sondaı-aq, Qazaqstan halqy Assambleıasynyń músheleri, Qoǵamdyq kelisim keńesi tóraǵasy men músheleri, qalalyq etnomádenı birlestikterdiń tóraǵalary men belsendileri, Almaty qalasynyń aýdandyq máslıhat depýtattary, qala jurtshylyǵy jáne respýblıkalyq «Jarasym» jastar uıymy qatysty.
Jınalysta sóılegender 2016 jyldyń 18 shildesi kúni Almatydaǵy terrorısttik shabýyldan qaza tapqandardyń otbasylarynyń qaıǵy-qasiretterine ortaqtasyp, kóńil aıtty. Sondaı-aq, Elbasynyń eldegi qaýipsizdikti nyǵaıtýǵa baǵyttalǵan málimdemesine tolyǵymen qoldaý kórsetti. Odan basqa, halyqty jalǵan aqparattarǵa senbeýge, arandatýshylyq áreketterge jol bermeý, terrorızmge birge tótep berýge shaqyrdy.
«Birlikti, beıbitshilik pen turaqtylyqty saqtaý - memleketimizdiń basty qundylyqtary», - dedi qatysýshylar.
Almaty qalasy ákimi apparaty «Qoǵamdyq kelisim» KMM baspasóz qyzmetiniń habarlaýynsha, «Jarasym» Respýblıkalyq jastar uıymy tóraǵasynyń orynbasary R. Kaıyrev oryn alǵan jaǵdaıǵa baılanysty Qazaqstan halqy Assambleıasynyń úndeýin oqydy.
Qoǵamdyq kelisim keńesiniń otyrysy aıaqtalǵan soń, qatysýshylar materıaldy qoldaý retinde aqshalaı qarajat jınap, shabýyldan qaza tapqandardyń otbasylaryna baryp shyqty.
