Almaty qalalyq Ekonomıkalyq qylmystar jáne jemqorlyqqa qarsy kúres departamenti bastyǵynyń orynbasary zańsyz tutqyndaldy degen aqparat jalǵan
ALMATY. Qarashanyń 12-si. QazAqparat /Erbol Azanbek/ - Birqatar buqaralyq aqparat quraldaryndaǵy Almaty qalalyq Ekonomıkalyq qylmystar jáne jemqorlyqqa qarsy kúres departamenti bastyǵynyń orynbasary, podpolkovnık A.Janteleevtiń tutqyndalýy zańsyz júrgizildi degen aqparat jalǵan.
Bul týraly búgin Ulttyq qaýipsizdik komıtetiniń Almaty qalasy boıynsha departamenti osyndaı aqparat taratty.
Departamenttiń baspasóz qyzmetiniń habarlaýynsha, A.Janteleevti tutqyndaý zań negizinde sot sanktsııasymen jáne prokýratýranyń baqylaýymen júzege asyrylǵan.
Esterińizge sala keteıik, Almaty qalalyq Ekonomıkalyq qylmystar jáne jemqorlyqqa qarsy kúres departamenti bastyǵynyń orynbasaryn UQK-niń Almaty qalalyq departamenti qyzmetkerleri birqatar qylmystarǵa qatysy bar degen kúdikpen tutqyndaǵan bolatyn. Qalalyq UQKD taratqan aqparatta A.Janteleevtiń esirtki zattaryn satyp alý, saqtaý, paıdalanýǵa qatysy barlyǵyn jedel-tekserý materıaldary, onyń ishinde beıne-dybys jazba materıaldary, kýágerlerdiń bergen derekteri kórsetkendigi aıtylady. Sondaı-aq tutqyndaý kezinde qalalyq narkologııalyq ortalyqta júrgizilgen tekserý barysynda kúdiktiniń esirtkige eltip alǵandyǵy anyqtalǵan. Budan bólek qosymsha júrgizilgen tekserister de A.Janteleevtiń uzaq ýaqyttan beri esirtki tutynatynyn kórsetken.
