Almaty qala kúnin merekeleýge daıyndalýda
ALMATY. Qyrkúıektiń 7-si. QazAqparat /Názıra Eleýhan/ - Almatyda qala kúnine arnalǵan birqatar merekelik sharalar ótedi,
dep habarlaıdy QazAqparat.
Qyrkúıek aıynyń úshinshi aptasynyń demalys kúnderi atalyp kele jatqan qala kúnine daıyndyqtar búginnen-aq qyzý bastalyp ketti. Jyl saıyn bul kúni ár túrli merekeler atalyp ótiletindigi belgili, biraq bıylǵy jyly qala óz merekesin erekshe atap ótpek.
Qyrkúıektiń 9-y men 11-i aralyǵynda Respýblıka saraıy janyndaǵy Abaı alańynda tuńǵysh ret "Orkestrler sherýi" ótedi. Ashyq aspan astyndaǵy festıvalde álemdik klassıkalyq mýzykanyń týyndylaryn belgili almatylyq orkestrler oryndaıtyn bolady. Atap aıtqanda, Qurmanǵazy atyndaǵy Qazaq memlekettik akademııalyq orkestri, QR Úrlemeli aspaptar orkestri, Memlekettik akademııalyq sımfonııalyq orkestri óner kórsetedi. Sonymen qatar, atalmysh sharaǵa A. Jubanov atyndaǵy, K. Baıseıitova atyndaǵy mýzyka mektebiniń oqýshylary, KSRO jáne QR halyq ártisteri Bıbigúl Tólegenova, Nurjamal Úsenbaeva, Janna Áýbakırova, sondaı-aq, belgili dırıjerlar K. Ahmetov, A. Belıakov qatysady. Sherýdi Qurmanǵazy atyndaǵy Qazaq memlekettik akademııalyq orkestri ashady.
Al, «Sazgen sazy» folklorlyq - etnografııalyq ansambli qala kúnine oraı jańa merekelik kontserttik baǵdarlama daıyndap jatyr. Elimizge tanymal ansambldiń merekelik, ári esep berý kontserti Abaı atyndaǵy opera jáne balet teatrynda qyrkúıek aıynyń 15-de ótedi.
Qyrkúıektiń 16-18 aralyǵynda, Memlekettik qýyrshaq teatrynda qazaqtyń burynǵy «Orteke» qýyrshaq janryn qaıta jandandyrýǵa baǵyttalǵan «Orteke 2010» atty qýyrshaq óneriniń halyqaralyq festıvali ótpek.
Sonymen qatar, qyrkúıektiń 18-i kúni eń basty sharalardyń biri bolyp tabylatyn, dástúrge aınalyp úlgergen «Almatym júregimde» atty án baıqaýy ótedi. Almaty týraly ánder shyrqalatyn baıqaý QR-ynyń Tuńǵysh Prezıdenti atyndaǵy saıabaqta ótedi. Bul kúni jas konkýrsanttar mereke qonaqtarymen jáne estrada juldyzdarymen birlesip án aıtady.
Qyrkúıektiń 19-y kúni «Astana» alańynda birinshi ret «Apple Fest» atty alma festıvali ótedi. Onyń maqsaty - Almatynyń ataqty aportynyń máni men maǵynasyn arttyrý jáne elimizde alma ósirý isiniń deńgeıin joǵarylatý. Shara barysynda almanyń tańdaýly sorttarynyń jármeńkesi, almadan jasalǵan túrli tátti taǵamdardan dám tatý uıymdastyrylady. Uıymdastyrýshylardyń aıtýynsha, bul merekelik shara keıin dástúrge enetin bolady.
Merekelik shara qazaq estrada juldyzdarynyń, KVN komandasynyń, «Orteke» qýyrshaq teatry halyqaralyq festıvali fınalısteriniń qatysýymen ótetin úlken kontsertpen jalǵasady. Mereke aıasynda jyl saıynǵy «Qazaqstan Arýy - 2010» ulttyq sulýlyq baıqaýy ótedi. «Astana» alańynda ótetin sulýlyq baıqaýynda elimizdiń túrli óńirinen kelgen arýlar baq synasatyn bolady. Merekelik shara otshashýmen aıaqtalady.
