Almaty irgesindegi turǵyndar laı-kóshkin astynda qalýdan qaýiptenip otyr

Jylda qar erip, kóktem shyqqanda Býrabaı kentiniń turǵyndary tabıǵattyń tosyn minezimen kúresip álek bolady. Tolassyz jaýǵan jaýynnan bıyl da aýlalardy sý basqan. Onymen qosa týra taýdyń irgesinde turǵan úılerdi saz-topyraq kóshkini basyp qalý qaýpi týyp otyr. «Aýlalardy, kómirhanalardy, qorajaılardy sý alyp barady. Úılerimizdiń irgetasy otyra bastady. Biz óz kúshimizben kúresip jatyrmyz. Aryq qazyp, qum-topyraqtan bóget qalap jatyrmyz. Qalashyqty salǵan qurylys kompanııasy aryq salýdy umyt qaldyrǵan», - dedi turǵyndar.

Qazir Talǵar aýdany Besaǵash aýylynyń ákimi, oblystyq, aýdandyq TJD ókilderi oqıǵa ornynda jumys jasap jatyr.

«Býrabaıda tań atqaly júrmiz. Ár úıge habarlama berip jatyrmyz. Sý kiretin jerlerdi bekitip, tehnıkalardy daıyndap jatyrmyz. TJD ókilderi men turǵyndar qum men tas toltyrylǵan bóget jasaýda. Sý aǵatyn ýaqytsha aryq, transheıa qazylýda», - dedi Besaǵash aýylynyń ákimi Marat Arynbaev.

Onyń aıtýynsha, Býrabaı kentinde 180-200 úı ornalasqan.

Olardyń ishinde 3-4 otbasyǵa ýaqytsha qaýipsiz jerge kóshý týraly habarlama berilgen.

Aýyl ákimdigi bıyl atalǵan aýylda aryq jelisi júrgizý men jol jóndeýdi qolǵa almaq.

Aıta ketý kerek, byltyr da Býrabaı kentiniń úıleri saz-balshyqtyń astynda qala jazdap edi.

Qopsyǵan topyraq qoparyla kóship 2-3 úıdiń aýlasyna deıin jetken edi.

Almaty oblystyq TJD baspasóz qyzmeti habarlaǵandaı, Talǵar aýdanynda erigen qar sýy 5 eldi mekendegi 62 otbasynyń aýlasyn sý basty.

Atap aıtqanda, Talǵar qalasynda - 9, Tuzdybastaý aýylynda - 27, Besaǵash aýylynda - 2, Qyzyltý aýylynda -10, Panfılov aýylynda 14 aýlany sý basqan. Qarasaı aýdanynda erigen qar sýy 4 eldi mekendegi 82 otbasynyń aýlasyn sý basty. Eńbekshiqazaq aýdany Baıterek aýylynda qardyń erýinen 29 turǵyn úıdiń aýlasyn sý basty. Eskeldi aýdanynda 10 turǵyn úıdiń aýlasyn sý basty.

Búgingi kúni Jambyl aýdany Uzynaǵash aýylynda 4 kósheni jáne 82 turǵyn úılerdiń aýlasyn sý alyp jatyr.