Almaty irgesindegi «Suńqar» tálimbaǵynda jasandy jolmen ósirilgen 5 balapan búrkit tabıǵat aıasyna jiberiledi (FOTO)
ALMATY. QazAqparat - Almaty irgesindegi Almaarasan shatqalynda ornalasqan «Suńqar» jyrtqysh qustar tálimbaǵynda jasandy jolmen ósirilgen búrkit balapandary jańa uıalarǵa, ıaǵnı volerge shyǵaryldy. Olar kóp uzamaı tabıǵat aıasyna jiberiletin bolady.
Búgin jýrnalısterge bergen suhbatynda «Suńqar» tálimbaǵynyń dırektory Ashot Anzorov búrkitterdiń ne úshin jasandy jolmen ósirilip, tabıǵatqa jiberiletindigin túsindirip berdi.
«Tabıǵatta tabıǵı iriktelý, tabıǵı shyǵyn degen bolady ǵoı. ıAǵnı, álsiz, ómirge beıimdelmegen qus óledi. Onyń ústine búrkit jylyna bar bolǵany bir nemese eki jumyrtqa ǵana salady. Al biz, mamandardyń arqasynda sol shyǵyndardy azaıtyp, qustardyń kóbeıýine jol ashamyz. Biz tipti embrıonnyń jumyrtqada durys damýyna kómek kórsete alamyz. Bul úshin, búrkit jumyrtqalaǵan kezde, onyń jumyrtqasy búrkitke baıqatpaı alynyp, ornyna ótirik jumyrtqa, ıaǵnı mýlıaj qoıylady. Al shyn jumyrtqa 45 kún ınkýbatorda 37,3 gradýs jáne 60-90 paıyzdyq ylǵaldylyqta saqtalady. Jumyrtqany jaryp shyqqan soń, balapan 2 aıdan astam ýaqytqa «ata-anasyna» qaıtarylady. Atalyq búrkit pen analyq búrkit balapandaryn jaqsy qabyldaıdy. Olardy baýyryna basady, qorektendiredi, tárbıeleıdi», - dedi A. Anzorov.
Sonymen qatar, ol búrkittiń balapandary tabıǵatqa 4-5 aılyǵynda jiberiletindigin aıtty. Oǵan deıin olar, atalyq jáne analyq búrkitten bólektendirilip, eki aıǵa jýyq ýaqyt jeke úlken volerlerde, ıaǵnı torly oryndarda ustalynady. Ondaǵy maqsat - jas búrkitterdi tabıǵat zańdylyǵyna barynsha beıimdeý.
«Bul kezde qustardyń adamdarmen baılanysy múldem toqtatylady. Tek tálimbaqtyń bir ǵana qyzmetkeri kúnniń kózi kórinbeı turyp, tańerteń olarǵa qorek ákep berip turady. Basqa eshkim barmaıdy. Bul volerler tálimbaqtyń kózge kórinbeıtin eń shet jerinde ornalasqan. Volerlerdiń aýmaǵy úlken. Onda jas búrkitter joǵary-tómen ushyp, qanattaryn shynyqtyrady. Olarǵa qorek retinde taýyqtyń balapandary, qoıandar, zerthanalyq egeýquıryqtar, kepterler jiberiledi. Jas búrkitter olardy ańdyp, ustap, óltirip, qorektenýge úırenedi. Bir volerde ádette 1-2 búrkitten bolady», - dedi A. Anzorov.
Sonymen bıyl shilde aıynyń sońy men tamyz aıynyń basynda jabaıy tabıǵat aıasyna 5 balapan búrkit ushyrylady. Anzor Amıranulynyń aıtýynsha, ushyrýdy bul mezgilden keshiktirýge bolmaıdy. Óıtkeni, dál osy kezde tabıǵatta jas qustar, saryshunaqtar kóp bolady. Al olardy aýlaý jas búrkitterge ońaıǵa túsedi.
Aıta ketelik, QR Bilim jáne ǵylym mınıstrligine qarasty «Zoologııa» ınstıtýty, «Efes Qazaqstan» AQ jáne «Suńqar» tálimbaǵynyń qoldaýymen 2012 jyldan beri elimizde «Óz úlesińdi qos. Tabıǵatty saqta» áleýmettik jobasy júzege asyrylyp keledi. Jeke menshik ıeligindegi «Suńqar» tálimbaǵynan 2013 jyly - 7, 2014 jyly - 4 jáne 2015 jyly - 4 búrkit tabıǵatqa jiberilgen.
Búrkitter tabıǵat aıasyna kúni búginge deıin Almaty oblysynyń Eńbekshiqazaq aýdanynda ornalasqan «Manýl» ańshylyq sharýashylyǵyna, sonymen qatar, Arqarly jáne Seriktas taýlaryna jiberilip kelipti.
Derekterge súıensek, búgingi tańda Qazaqstanda tabıǵat jaǵdaıyndaǵy búrkitterdiń sany - 2 myń basty quraıdy. 
