Almaty irgesinde buzylý qaýpi bar taý kólderiniń sýyn azaıtý sharalary júrgizilýde
ALMATY. QazAqparat - Sınoptıkterdiń boljamy boıynsha bıylǵy jazǵy mezgilde Almaty oblysynda kún ystyq bolýy múmkin. Osyǵan baılanysty, taýdaǵy qardyń tez erýi morenalyq kólderdiń merziminen buryn tolýyna ákep soǵady. Sondyqtan, QR ІІM Tótenshe jaǵdaılar jónindegi komıtetiniń «Qazseldenqorǵaý» qyzmeti turaqsyz taý kólderindegi sý deńgeıin tómendetý úshin, artyq sýdy qubyr arqyly aǵyzý sharalaryn qarastyrdy. Bul týraly búgin Almaty qalalyq TJD baspasóz qyzmetinen habarlady.
Alaıda, qardyń tez erýi qosymsha sharalar qoldanýǵa májbúrleýde.
Almaty qalasynyń ákimi Baýyrjan Baıbektiń tapsyrmasy boıynsha Úlken Almaty men Kishi Almaty, sondaı-aq, Aqsaı ózenderiniń bastaýynda ornalasqan birneshe turaqsyz kólderdiń sýyn tez arada tolyǵymen aǵyzyp jiberý jóninde arnaıy jospar jasaldy. Osy maqsatta «Qazseldenqorǵaý» qyzmeti ázirlegen, ónimdiligi joǵary qalqymaly sýsorǵysh qondyrǵylardy qoldaný týraly sheshim qabyldandy. Bir sýsorǵyshtyń kómegimen bir kóldegi sý deńgeıin 15 kún ishinde qaýipsiz deńgeıge deıin túsirýge bolady.
Sonymen qatar, qala ákiminiń sheshimine sáıkes, qalanyń kommýnaldyq qyzmetteri tarapynan «Qazseldenqorǵaý» qyzmetiniń qaramaǵyna ónimdiligi joǵary 7 sýsorǵysh qurylǵy berildi.
Salǵa ornatylǵan bul sýsorǵysh qurylǵylardy jetkizý úshin QR ІІM Tótenshe jaǵdaılar jónindegi Komıtetiniń avıatsııasy paıdalanyldy.
Bıik taýda jáne jetýge joly qıyn aýmaqta ornalasan kólderdiń jaǵasyna pontondardy jetkizý operatsııalary oıdaǵydaı júrgizilip jatyr.
№ 4-shi, 8-shi kólderge eki sýsorǵyshtan jáne №13-shi kólge bir sýsorǵysh jetkizildi. Taǵy eki saldyq qurylǵy «Qazseldenqorǵaý» qyzmetiniń Úlken Almaty shatqalyndaǵy bazasynda ázirlenip jatyr.
Qoldanylyp jatqan sharalar morena kólderindegi sý deńgeıin muzdyqtar erimeı turyp, baqylaýda ustaýǵa múmkindik beredi.
Budan basqa, Aqsaı, Qaraǵaıly, Úlken jáne Kishi Almaty shatqaldarynda qosymsha 8 bıik taýly maýsymdyq beketter ornatyldy. Olardan basqa, bul shatqaldarda 9 turaqty beket bar.
Almaty qalasy ákiminiń tapsyrmasymen №13-shi bıs jáne №6-shy kólderdiń arasyndaǵy bógetterdi alyp tastaý jumystaryna 30 mln teńge bólindi. Bógetter alynǵan soń, bul kólder tranzıttik kólderge aınalyp, olardan qalaǵa keletin qaýip joıylady.
Jalpy, «Qazseldenqorǵaý» qyzmeti buzylý qaýpi bar dep belgilegen 15 kólde aldyn alý sharalaryn júrgizý josparlanǵan.
