Almaty ınvestorlary Pavlodar oblysynda birqatar óndiris jelisin iske qosýlary múmkin - E. Áýkenov

ALMATY. QazAqparat - Almatyda Elbasy N.Nazarbaevtyń qazaqstandyq mazmunnyń úlesin, óńiraralyq taýar aınalymyn arttyrýdy jáne turǵyndardy sapaly jáne baǵasy qolaly otandyq ónimdermen qamtamasyz etý týraly tapsyrmasy júzege asyrylyp jatyr.

Almaty ákimdigi kúni búginge deıin ımporttyq taýarlardyń ornyn aýystyrý boıynsha 48 ınvestıtsııalyq jobany maquldady.

Qalada shet elderden úlken kólemde jetkiziletin 86 taýarlar toby anyqtaldy. Mysaly, tutynylatyn irimshikter men qus etiniń teń jartysy, shujyq buıymdary men sary maıdyń 40 paıyzdan astamy shet elderden jetkiziledi eken. 

Búgin Almaty ákimdiginde Almaty men Pavlodar oblysynyń basshylyǵy kezdesip, óńiraralyq kooperatsııa aıasynda yntymaqtastyq týraly memorandýmǵa qol qoıdy. 

Óz baıandamasynda Almaty ákiminiń orynbasary Erlan Áýkenov Almatyda bir jyl ishinde 500 mlrd teńgeniń taýary óndiriletindigin atap ótti. Al bul, Jalpy ishki ónimniń - 5 paıyzyn quraıdy.  

Al Almatyǵa jylyna 11 mlrd dollardyń, ıaǵnı 4 trln teńgeniń taýar jetkiziledi. 

«Almaty ınvestorlaryn Pavlodar oblysyna aparýǵa múmkindik bar. Olar onda birqatar óndiris jelisin iske qosa alady. Óńirlerge qarjy jumsaýǵa daıyn bıznesmenderimiz bar. Bizge ózara tıimdi kooperatsııa jasaý óte qajet. Qazaqstandyq mazmun, ındýstrıalızatsııa, shaǵyn jáne orta bızneske qoldaý kórsetý boıynsha ózara taýar aınalymyn arttyrý maqsatynda biz birlese kóp jumystar atqara alamyz», - dedi E. Áýkenov.   

Óz kezeginde Pavlodar oblysynyń aýyl sharýashylyǵyn óndirýshileri Almatyǵa qolaıly baǵaǵa ár túrli sapaly taýarlar jetkizýge daıyn ekendikterin bildirdi.