Almaty ІІD qala ákimdigi ǵımaratyn arnaıy qyzmetterdiń qorshaýǵa alý sebebin túsindirdi (FOTO)
ALMATY. QazAqparat - Almaty ІІD qala ákimdigin qorshaýǵa alý sebebin túsindirdi.
«Búgin saǵat 11:27 shamasynda Almaty qalalyq ákimdiginiń ǵımaratyna kirgen beıtanys adam, kelýshiler bólmesine kirip, ishten jaýyp alyp syrtqa shyqpaı qoıǵan. Artynsha osy ákimdikte shuǵyl shtab quryldy. Bólmege bekinip alǵan adam bir saǵattan astam ýaqyt eshqandaı talap qoıǵan joq. Onymen osy ýaqyt ishinde sóılesý sharalary júrgizildi. Nátıjesinde 13 saǵat 35 mınýtta ol óz erkimen bólmeden shyqty», - dep túsindirdi qala ІІD baspasóz hatshysy Saltanat Ázirbek.
Ol qazirgi kezde tergeý sharalary júrgizilip, mundaı áreketke barý sebepteri anyqtalyp jatqanyn atap ótti.
«Aldyn ala málim bolǵanyndaı, bul er adam mundaı áreketke 2008 jyly azamattyq ister jóninde qabyldanǵan sot sheshimine narazylyq retinde barǵan eken. Tolyq aqparat keıinirek usynylady», - dep túıdi S. Ázirbek.
