Almaty-Hýrgada reısiniń keshiktirilý sebebi túsindirildi

ALMATY. QazAqparat - Almaty-Hýrgada áýe reısi keshiktirildi. Avıakompanııanyń málim etýinshe, ushý aldyndaǵy daıyndyq barysynda qosymsha tehnıkalyq qyzmetter qajettigi týyndaǵan, dep habarlaıdy QazAqparat tilshisi.

Áleýmettik jelide narazy jolaýshylardyń reıstiń tym uzaqqa keshiktirilýine baılanysty ótemaqy talap etken vıdeosy tarady.

«Saǵat 17:30. «SCAT» áýe kompanııasynyń DV 3419 Almaty-Hýrgada reısi saǵat 8:15-ten beri ushpady. Jolaýshylar 10 saǵattan astam ýaqyt buryn baqylaý aımaǵynan ótken. Qonaq úıdegi bir kúnniń kúıip ketýine baılanysty eshkim ótemaqy tólemeıdi, basshylyq tarapynan eshqandaı aqparat berilmedi... Ushaq ushýǵa jaramsyz desedi. Ár eki saǵat saıyn reıs ýaqytyn sozyp jatyr. 187 adam bala-shaǵasymen otyr», - dep jazady jolaýshy.

Áýe kompanııasynyń baspasóz qyzmeti ushý aldyndaǵy daıyndyq barysynda qosymsha tehnıkalyq qyzmetter qajettigi týyndaǵanyn aıtty. Jolaýshylar áýejaıda kútý kezinde barlyq qajettiliktermen qamtamasyz etilgenin, sonyń ishinde ystyq tamaq pen sýsyn berilgenin málimdedi.

«Al, ótemaqy máselesi boıynsha týrıstik paket satyp alynǵan týragenttikke júginý qajet», - dedi áýe kompanııasynan.