Almaty Hub alańynda Silkway Accelerator baǵdarlamasyna ótinim qabyldaý bastaldy
ASTANA. KAZINFORM – Astana Hub halyqaralyq ınnovatsııalyq klasteri Google for Startups jáne Almaty qalasynyń ákimdigimen birlesip Silkway Accelerator baǵdarlamasynyń jetinshi legine ótinim qabyldaý bastalǵanyn jarııalady.
Baǵdarlama tehnologııalyq startaptardy jyldam damytýǵa baǵyttalǵan jáne oǵan Qazaqstan, Ózbekstan, Qyrǵyzstan, Tájikstan, Túrikmenstan, Ázerbaıjan, Grýzııa jáne Mońǵolııa elderiniń komandalary qatysa alady. Ótinimder 30 sáýirge deıin astanahub.com platformasynda qabyldanady.
Qazaqstan – Ortalyq Azııada Google for Startups-pen birlesip osyndaı akseleratsııalyq baǵdarlamany iske asyryp otyrǵan alǵashqy ári jalǵyz el. Bıyl baǵdarlama alǵash ret Almatyda Almaty Hub alańynda ótedi.
Silkway Accelerator sońǵy jyldary óńirdegi startaptardy damytýda mańyzdy quralǵa aınaldy. Tórt jyl ishinde baǵdarlamaǵa 1470 ótinim túsip, onyń 73 startapy iriktelip, akseleratsııadan tolyq ótken. Baǵdarlama túlekteri jalpy 48 mln AQSh dollarynan astam ınvestıtsııa tartyp, olardyń jıyntyq baǵasy 500 mln dollardan asqan. Olar BAÁ, Túrkııa, AQSh jáne ózge de elderdiń naryǵyna shyqqan.
«Silkway Accelerator bizge negizgi maqsattarǵa nazar aýdarýdy, qaı naryqtarǵa shyǵý keregin durys tańdaýdy jáne basqa elderdiń naryǵyn tereńirek taldaýdy úıretti. Osy tájirıbeniń nátıjesinde Biometric.Vision óz damýyn jedeldetip, komandasyn kúsheıtip, ónim strategııasyn naqtylaı aldy. Silkway Accelerator – myqty halyqaralyq qaýymdastyq, qazaqstandyq startaptardyń onyń bir bóligi bola alatyny qýantady. Qazir biz Qazaqstan naryǵynda nyq ornyǵyp, Qyrǵyzstan men Malaızııada jumys istep jatyrmyz, sondaı-aq Meksıka, Ázerbaıjan, Sıngapýr jáne BAÁ elderinde pılottyq jobalar júrgizip jatyrmyz. Bul tek bastamasy ǵana», – dedi Biometric.Vision kompanııasynyń bas dırektory ári negizin qalaýshy Álibek Narymbaı.
Baǵdarlama 12 aptaǵa eseptelgen jáne daıyn ónimi bar, ony ári qaraı damytyp, jańa naryqtarǵa shyǵarýdy kózdeıtin komandalarǵa arnalǵan.
Qatysýshylarǵa jan-jaqty qoldaý kórsetiledi. Atap aıtqanda, basqa qala nemese elden kelgen komandalarǵa Almatyda tegin turý múmkindigi men keńse usynylady, Google Cloud resýrstaryna 100 000 AQSh dollaryna deıin qoljetimdilik beriledi, Google Workspace servısteri usynylady, sondaı-aq ár komandaǵa jeke damý menedjeri bekitiledi.
«Qazaqstan – aımaqta startap ekojúıesi birneshe jyldan beri júıeli túrde damyp kele jatqan sırek naryqtardyń biri. Qazirgi negizgi másele – jańa quraldar jasaýda emes, startaptardyń sapasyn arttyrýda jáne olardyń masshtabtalý qabiletinde. Silkway Accelerator dál osy kezeńmen jumys isteıdi», – dedi baǵdarlama jetekshileriniń biri Evgenıı Frolov.
Baǵdarlama sońynda Demo Day ótedi. Onda qatysýshylar óz jobalaryn ınvestorlarǵa, venchýrlik qorlarǵa jáne seriktesterge tanystyrady. Eń úzdik startaptar Astana Hub Ventures short-lıstine enip, ınvestıtsııa tartý múmkindigine ıe bolady.
Aıta keteıik, Google for Startups – 2011 jyly Google iske qosqan halyqaralyq baǵdarlama. Al Astana Hub – Ortalyq Eýrazııadaǵy eń iri halyqaralyq ınnovatsııalyq klaster, onda 2 myńnan astam IT-kompanııa tirkelgen.
