«Almaty» hokkeıshileriniń ýlanǵany týraly aqparat teriske shyǵaryldy
ALMATY. QazAqparat - «Almaty» jáne «Barys» hokkeı komandalary arasynda josparlanǵan kezdesý ótpeıtin boldy, dep habarlaıdy QazAqparat tilshisi.
«Barys» klýby Qurlyqtyq hokkeı lıshasynyń jańa maýsymyna daıyndyǵyn jalǵastyrýda. Erteń astanalyq komanda Almatydaǵy «Aq bulaq» sporttyq saýyqtyrý kesheninde jas sportshylar úshin sheberlik sabaǵyn ótkizedi. Al 28 shildege belgilengen «Almaty» men «Barys» arasyndaǵy joldastyq kezdesý ótkizilmeıtin boldy.
Buǵan deıin BAQ betterinde joldastyq kezdesý almatylyq komandanyń birqatar oıynshysy tamaqtan ýlanyp qalýyna baılanysty ótpeıtindigi jóninde habarlanǵan bolatyn. Alaıda, klýb basshylary bul aqparatty teriske shyǵardy.
«28 shildege belingen oıyn ýaqyt kestesiniń sáıkes kelmeýine baılanysty ótkizilmeıtin boldy. Ýaqytty sáıkestendirý múmkin bolmaı jatyr. «Barys» komandasy Almatyda bolmaıdy, olar saparǵa daıyndalýda. Bizdiń oıynshylar olardyń jattyqtyrý bazasyna barý úshin úlgermeıdi. Ózara oıyn týraly kelesim dırektorlar arasynda jasalǵan bolatyn», - dedi QazAqparat tilshisine «Almaty» HK ókili Evgenıı Galenkovskıı.
Aıta keteıik, «Barys» HK resmı saıtynda matchtyń ótpeýiniń sebebi retinde «Almaty» klýbynyń ýaqyt kestesimen sáıkes kelmeýi atap kórsetilgen.
