«Almaty» hokkeıshileri «Altaı-Torpedodan» basym tústi
ALMATY. QazAqparat - Almatyda «Halyq Arena» muz aıdynynda erler arasyndaǵy shaıbaly hokkeıden el chempıonatynyń úshinshi týry aıaqtaldy, dep habarlaıdy QazAqparat tilshisi Almaty qalasynyń Aqparattyq jáne sporttyq HAB-yna silteme jasaı otyryp.
Almatylyq ujym osy maýsymdaǵy Almatyda ótken alǵashqy kezdesýlerin óskemendik «Altaı-Torpedo» komandasynda qarsy ótkizdi. Birinshi kezdesýde qos komanda qyzyqty oıyn kórsetkenimen, Igor Dorohın shákirtteri basymdylyq tanytyp, 4:0 esebimen jeńiske jetti. Maksım Rybalko, Andreı Spırıdonov, Dmıtrıı Lohanın jáne Ramazan Aldamjarov mergendigimen kózge tústi.
Al, ekinshi kezdesý aıasynda almatylyqtar alǵashqy mınýttardan-aq belsendi qımyldap, óz jankúıerlerine kóterińki kóńil kúı syılady.
Igor Dorohın shákirtteriniń sapynan Evgrafov, Rahmanov,Bılalov, Ogorodnıkov jáne Spırıdonovtar kózge tússe, salǵan shaıbalarǵa óskemendikterdiń sapynan Shestakov pen Tileýbaev esep aıyrmasyn qysqarta aldy. Osylaısha, 5:2 esebimen «Almaty» komandasy jeńiske jetti.
«Qonaqtaǵy oıyndardan keıin búgingi jeńis bizge aýadaı qajet boldy. Jaqsy oıyn kórsettik dep oılaımyn, tek óz múmkindikterimizdi paıdalana almadyq. Barlyq komandalardy jeńýge tyrysamyz. Alda áli qıyn oıyndar kútip tur, tek jaqsy nátıjelerge ǵana úmittenemiz», - dedi «Almaty» HK oıynshysy Ilnar Mısbahov.
Aıta keteıik, Igor Dorohın shákirtteri kelesi oıyndardy da «Halyq Arena» muz aıdynynda 23-24 qyrkúıek kúni pavlodarlyq «Ertiske» jáne 28-29 qyrkúıekte «Beıbarys» klýbyna qarsy ótkizetin bolady.
