«Almaty» hokkeı klýby Qazaqstan kýbogy úshin synǵa túsedi - klýb prezıdenti
ALMATY. 3 tamyz. QazAqparat /Ádilet Musahaev/ - «Almaty» hokkeı klýby Qazaqstan chempıonatynda óner kóresetin bolady jáne respýblıka kýbogy úshin synǵa túsedi.
Bul jaıynda búgin atalǵan klýbtyń prezıdenti Asqar Shopabaev baspasóz máslıhatynda aıtty.
Ótken jyly qalamyzda Qysqy Azııa oıyndary ótkeni belgili, osy turǵyda qala ákiminiń qoldaýymen «Almaty» hokkeı klýby qurylǵan bolatyn. A.Shopabaev qalamyzda sportty damytýǵa kóp jaǵdaı jasalǵandyǵyn alǵa tarta kele, mundaı qalanyń óz hokkeı klýby bolǵany jón ekendigin jetkizdi. «Komandamyzdyń bolashaǵy zor, jaqynda klýb qataryna kásibı jas sportshylardy tarttyq. Óskemen, Qaraǵandy jáne Reseı men Ýkraınadan sportshylardy klýbymyzǵa shaqyryp, kelisimshartqa otyrdyq. Sportshylardyń barlyǵyna Almaty men olarǵa jasalǵan jaǵdaı unap otyr. Olardyń keleshekte de osy jerde turaqtap qalýyna jaǵdaıdy jaqsarta túsemiz degen oıdamyn», -deıdi klýb prezıdenti.
Sonymen qatar ol Almatyda hokkeıge degen qyzyǵýshylyq mol ekendigin, sondyqtan túrli jarystar da jıi ótkizilip turatyndyǵyn aıtady. Qalada 15-ke tarta ardagerler komandasy bar bolsa, 10-ǵa jýyq balalar komandasy Qazaqstan chempıonatyna qatysyp júr.
Qurylǵanyna 15 jyl bolǵan hokkeıden áıelder quramasy bıyl ótken Qysqy Azııa oıyndarynda birinshi ret óz alańynda jeńiske jetti. Bul almatylyqtardyń hokkeıge degen qyzyǵýshylyǵyn odan ári arttyryp, halyqtyń hokkeıge den qoıa bastaýyna ákelgen.
