Almaty HQO-larynda turǵyndardyń máseleleri shuǵyl túrde sheshimin tabatyn bolady
ALMATY. QazAqparat - «Azamattarǵa arnalǵan úkimet» memlekettik korporatsııasy KEAQ Almaty qalasy boıynsha fılıalynda QR Memlekettik qyzmet isteri agenttiginiń Almaty qalasy boıynsha departamenti mamandary jáne qoǵamdyq uıymdar ókilderiniń qatysýymen qoǵamdyq qabyldaý ótti, dep habarlaıdy QazAqparat tilshisi.
Shara qala turǵyndarynyń memlekettik qyzmetterdi alýdaǵy túıtkildi suraqtaryna jaýap berý, quqyq buzýshylyqtarǵa tózbeý qaǵıdatyn qalyptastyrý, sybaılas jemqorlyqtyń aldyn alý maqsatynda uıymdastyryldy.
«Biz aldaǵy ýaqytta ár aýdandaǵy HQO bólimderinde qyzmet alýshylarmen betpe-bet kezdesip, máseleleriniń shuǵyl sheshilýine yqpal etpekpiz. Shara turǵyndarǵa qanshalyqty paıdaly bolsa, olardyń syn-eskertpeleri arqyly biz de qyzmet usyný úderisterin jetildire beretin bolamyz», - dedi «Azamattarǵa arnalǵan úkimet» memlekettik korporatsııasy KE AQ Almaty qalasy boıynsha fılıalynyń dırektory Ermek Bekjúnisov.
Іs-shara barysynda 50-ge jýyq qyzmet alýshynyń suraqtary tyńdalyp, keıbir máselelerdi Departament óz quziretiniń sheginde baqylaýǵa aldy. Suraqtardyń basym kópshiligi áleýmettik salasyna, jer jáne qujattandyrý máselelerine qatysty boldy.
«Memleket basshysynyń «Halyq únine qulaq asatyn memleket» qaǵıdatyn iske asyrý jónindegi tapsyrmasyn oryndaý sheńberinde memlekettik qyzmetter kórsetý barysynda halyqtyń kóp kedergilerge tap bolmaı, sapaly qyzmet alýyna jaǵdaı jasaý. Sharany uıymdastyrýdaǵy maqsatymyz - memlekettik organdardyń ashyqtyǵy men aıqyndyǵyn qamtamasyz etý. Qalyptasqan syndarly dıalogta nátıjege qanaǵattanǵan jáne memlekettik organdardyń jumysy týraly oń pikirlerin qaldyrǵan azamattardyń birqatar qajettilikteri sheshildi», - dedi Qazaqstan Respýblıkasynyń memlekettik qyzmet isteri agenttigi Almaty qalasy departamentiniń ókili Maqsat Jańbyrshıev.
Shara sanıtarlyq normalardy, sonymen qatar áleýmettik qashyqtyqty saqtaı otyryp ótkizildi. Mundaı qoǵamdyq qabyldaýlar qalanyń árbir aýdanyndaǵy front-ofısterde (HQO) apta saıyn ótip turady dedi uıymdastyrýshylar.
