Almaty HQKO kıbershabýyl týraly habardy rastamady
ALMATY. QazAqparat - Almaty halyqqa qyzmet kórsetý ortalyǵynyń ókilderi kıbershabýyl týraly qaýesetti joqqa shyǵardy, dep habarlaıdy QazAqparat tilshisi.
Búgin áleýmettik jelide qoldanýshylar Bostandyq jáne Áýezov aýdanyndaǵy HQKO bazasy jumys istemeı turǵanyn jarııalaǵan bolatyn.
Almaty qalalyq HQKO bas keńsesiniń baspasóz hatshysy Apetova Jańyldyń aıtýynsha, qazba jumystarynyń kesirinen sym temirleri úzilgen.
«Áýezov jáne Bostandyq aýdandarynda júrgizilgen qazba jumystarynyń saldarynan jerasty symdary úzilgen. Sonyń saldarynan eki aýdandaǵy elektrondy qyzmet kórsetý bazasy isten shyqqan. Tańerteń 9:20-da baılanys úzildi. Eshqandaı kıbershabýyl bolǵan joq», - dedi Jańyl Apetova.
Qazirgi tańda Bostandyq aýdandyq HQKO 16:00-den bastap shtattyq rejimde jumys istep tur.
