Almaty haıýanattar baǵyndaǵy erekshe oqıǵa: Keriktiń 5-shi tóli dúnıege keldi, onyń aty - Astana
; ALMATY. Tamyzdyń 5-i. QazAqparat /Názıra Eleýhan/ - Almaty haıýanattar baǵynda erekshe oqıǵa boldy. Osyndaǵy eresek jup keriktiń 5-shi tóli dúnıege keldi.
«Álemniń birde bir haıýanattar baǵynda 5 jyl ishinde jyl saıyn keriktiń tóldi bolýy jaǵdaıy kezdesken emes. Astana kúni dúnıege kelgen jas tóldiń esimin - Astana dep atadyq. Búgin oǵan bir aı toldy. Ol óz aıaǵymen nyq tura alady, butaqtardyń japyraqtaryn, almany jeýge talpynýda», dedi búgin Almaty haıýanattar baǵynyń dırektory Áýezhan Ábdrahmanov.
Onyń aıtýynsha, Almaty haıýanattar baǵynda alty kerik bar. «Jylda tóldi bolýdyń qupııasy - olarǵa jasalǵan jaǵdaıdyń jaqsy bolǵandyǵynda. Olardyń júrip-turatyn aımaǵy barlyq tehnıkalyq normalarǵa saı. Ol boıynsha bir kerikke 200 sharshy metr aýmaq kerek bolsa, bizde árqaısysyna 500 sharshy metrden keledi», dep atap ótti Áýezhan Ábdrahmanov.
Sektsııa basshysy Qasen Bekqulovtyń aıtýynsha, urpaqty bolǵan Sulý jáne Han esimdi kerikter Qazaqstanǵa 2003 jyly 3 jasynda ákelingen. «Olar 2006 jyldan bastap tól bere bastady. Bıylǵy súıkimdi kerik 40 keli salmaqpen dúnıege keldi. Boıynyń uzyndyǵy 168 sm boldy. Jas kerik alǵashqy saǵattyń ózinde aıaǵynan tik turdy. Búginde anasy balasynyń janyna eshkimdi jolatpaıdy, ózi qorǵap, ózi qaraýda», dedi ol.
Haıýanattar baǵyndaǵy ala qulandar, arqarlar, buǵylar men qodastar tóldi boldy. Amýr jolbarysy 3 kúshik týsa, qabylanda eki kúshik bar. Bıyl sonymen qatar, aqqýlar tuńǵysh ret 6 balapandy boldy", dep atap ótti Áýezhan Ábdrahmanov. Mamannyń aıtýynsha, bıyl haıýanattar baǵynda «jemisti» jyl bolǵan.
Zoobaq basshylary kerikterdi qazaqstandyq basqa da haıýanattar baǵyna satý, sonymen qatar shet elden taǵy da eki jup kerik satyp alýdy josparlap otyr.
