Almaty haıýanattar baǵynda kishkentaı sýsıyr ómirge keldi

ALMATY. QazAqparat ؘ– Almaty haıýanattar baǵynda Djambo jáne Lottı esimdi sýsıyrlardyń otbasynda kishkentaı sýsıyr ómirge keldi, dep habarlaıdy QazAqparat tilshisi.

Zoobaqtyń málimetinshe, kishkentaı sýsıyrdyń ákesiniń esimi – Djambo. Ol 2007 jyly ómirge kelgen. 2009 jyly Izraılden Almaty haıýanattar baǵyna ákelingen. Onyń syńary Lottı 2010 jyly ómirge kelgen. 2018 jyly Frantsııadan Almaty zoobaǵyna ákelingen.

«Olar birden jup bolmady. Alǵashqy kezde Djambo Lottıdi súzip, qarsylyq kórsetetin. Ýaqyt óte kele ekeýi til tabysyp ketti. Lottı 22 mamyr kúni tóldedi. Kishkentaı urǵashy sýsıyrdyń salmaǵy 38 keli, boıy 50 sm. Qazir olardyń jaǵdaıy jaqsy. Ekeýi daladaǵy qorshaýǵa ornalastyryldy», - dep habarlady zoobaqtyń baspasóz qyzmeti.

Sondaı-aq zoobaq ujymy kishkentaı sýsıyrǵa at qoıý úshin oqyrmandarǵa Instagram paraqshasynda usynys pikirlerin qaldyrýdy, úzdik esimdi zoobaq ujymy tańdap alatynyn habarlady. Odan bólek, zoobaq ujymy «Afrıka savannasy» kesheni qurylysynyń jobalyq-smetalyq qujatyn daıyndaýdy bastaǵanyn málim etti.

«Aldaǵy ýaqytta bul jerde sýsıyrlar, pilder, kerikter, zebralar men antılopalar turatyn bolady. Joba ýaqytynda jasalsa, kelesi jyly qurylysty bastaımyz», – dep habarlady zoobaqtan.

Eske salsaq, Almaty haıýanattar baǵynda «Afrıka savannasy» kesheni salynatyny týraly habarlaǵanbyz.