Almaty haıýanattar baǵyna jetkizilgen qar barysynyń jaǵdaıy jaqsaryp keledi

ALMATY. QazAqparat – Almaty oblysynyń Sarybastaý aýylynan tabylǵan qar barysynyń jaǵdaıy túzelip keledi. Bul týraly Almaty zoobaǵynyń ujymy Instagram paraqshasyna jazdy, dep habarlaıdy QazAqparat tilshisi.

20 sáýir kúni Almaty zoobaǵyna Almaty oblysy, Sarybastaý aýylynan 2,5-3 jastaǵy qar barysy jetkizilgen.

Zoobaq ujymynyń málimetinshe, jyrtqysh janýar ábden álsiregen, aldyńǵy sol aıaǵynyń tabany men artqy aıaqtarynyń tabanynda kesilgen jaraqat bar.

Veterınar dárigerler baqylaý júrgizip, jaraqattan aıaqtary dirildeıtinin anyqtaǵan.

«Mamandar ımmýnıtet kóteretin dáriler salyp, jarasyn tańǵan soń, barys arnaıy jeke volerde karantınge ornalastyryldy. Janýar kúshti stress alǵan, biz ony barynsha mazalamaýǵa tyrysamyz. Tábeti jaqsy, kúnine 2,5 kg et jeıdi sıyr, taýyq, qoıan eti. Qazirgi ýaqytta jaǵdaıy túzelip keledi. Janýardyń densaýlyq jaǵdaıyn tolyq anyqtaý úshin synama tapsyryldy jáne rentgenge túsirildi, nátıjesin kútip otyrmyz», - dep habarlady Almaty zoobaǵy ujymy.

Eske salaıyq, Almaty oblysynda er adam mal baǵyp júrip jol-jónekeı álsiregen qar barysyn kezdestirgen.

Dereý quzyrly organdarǵa habarlaý nátıjesinde janýar qamqorlyqqa alyndy.

Orman sharýashylyǵy jáne janýarlar dúnıesi komıteti Qyzyl kitapqa engen janýardyń 20 sáýir kúni Almaty haıýanattar baǵyna jetkizilgenin habarlaǵan edi.