Almaty halyq mýzykalyq aspaptar mýzeıine Shákárimniń dombyrasy berildi
ALMATY. QazAqparat - Almatydaǵy Yqylas atyndaǵy halyq mýzykalyq aspaptary mýzeıine Shákárim Qudaıberdiulynyń dombyrasy tapsyryldy, dep habarlaıdy QazAqparat tilshisi.
Qundy jádigerdi mýzeıge Shákárimniń urpaǵy tabystady.
«Medǵat Quljanov atasy Shákárimniń dombyrasyn jyldar boıy saqtap kelgen. Ol Shákárimniń tikeleı urpaǵy bolyp keledi. Oǵan 15 jyl buryn Semeı ýnıversıtetteriniń biriniń rektory tapsyrǵan», - dedi mýzeıdiń ǵylymı qyzmetkeri Qýanysh Kúlesh.
Dombyra - qos ishek pen 13 perneden turady, tutas aǵashtan oıyp jasalǵan. Dombyrany kim ári qashan jasaǵany belgisiz.
Shákárimniń dombyraǵa áýestigin kórgen Abaı Bitkenbaı rýynan ataqty sheberlerdi alǵyzady.
Sol sheberlerdiń biri Qudaıberdi aýylynda 1 jyldaı turyp ol jas Shákárimdi «Saımaqtyń sary ózeni», «Alshaǵyrdyń ashty kúıi», «Asan kúıi», «Ala baıraq», «Kertolǵaý» sııaqty ataqty kúılerdi úıretedi.
Shákárim ylǵı óz estelikterinde dombyrany úıretken Bitkenbaı ustaz ekendigin aıtyp otyrady.
14-15 jasynan Shákárim ózi mýzyka jaza bastaıdy.
Qýanysh Kúleshtiń aıtýynsha, Shákárimniń qolyndaǵy kúmbirlegen qara dombyra endi halyq murasyna aınalmaq.
Aqynnyń urpaqtary bul dombyrany kóziniń qarashyǵyndaı saqtap kelgen. Medgat Quljanovtyń ákesi kezinde Shákárimniń shyǵarmalaryn oryndaýǵa qumartqan.
Búginde mýzeıde 1000 asa ulttyq aspap saqtalyp tur.
Abaı, Birjan, Jambyl, Yqylas, Seıtek, Dına Nurpeıisova, Ahmet Jubanov, Kenen Ázirbaev, Ábiken Hasenov taǵy basqa aqyn-jyraýlardyń, kompozıtorlardyń 60 jýyq dombyrasy bar.
