Almaty halqy karantın tártibine baǵynbaıtyn óńirlerdiń basynda tur - Toqaev
NUR-SULTAN. QazAqparat - Prezıdent Qasym-Jomart Toqaev Almaty qalasynyń ákimi Baqytjan Saǵyntaevtyń jumysyn synǵa alyp, Almaty halqy karantın tártibine eń qatty baǵynbaıtyn óńirlerdiń basynda turǵanyn atap ótti, dep habarlaıdy QazAqparat tilshisi.
«Karantın sharalaryn saqtaý jaǵynan Almaty halqy – tártipke eń qatty baǵynbaıtyndardyń basynda tur. Muny bárimiz jaqsy bilemiz. Onymen qoımaı Almatydan osy jaqqa «ulttyq parkterdi ashyńdar, demalǵymyz keledi» dep hat jazyp jatqandar bar. Túsinip bolmaısyń. Ideologııalyq deńgeıde qandaı da bir jumys atqarylýy kerek qoı», - dedi Qasym-Jomart Toqaev koronavırýs ınfektsııasynyń taralýyna qarsy kúres máseleleri boıynsha selektorlyq otyrysynda.
Prezıdent Almaty qalasynyń ákimi Baqytjan Saǵyntaevqa osy jumysty tıisti deńgeıde júrgizýdi tapsyrdy.
«Dári-dármekpen dárihanalardy qamtamasyz etý máselesi boıynsha: biz 43 dárihanany taldadyq. Dese de dári-dármek tapshylyǵy áli de bar. Jetpeı jatqan dáriniń bárin atamaı-aq qoıaıyn. Oǵan qosa uzyn-sonar kezekti de kórip otyrmyz. 80-90 adamǵa deıin bar. Nazarbaev dańǵylyndaǵy №2 ortalyq dárihanadaǵy kezekte 30-40 adam tur. Áýezov kóshesindegi «Apteka +» dárihanasynda da sol. Ol kezekter týraly foto-vıdeolar áleýmettik jelide tarap júr. «Úkimet jalqaý. Ákimder ony moıyndamaıdy. Jaǵdaı baqylaýdan shyǵyp ketti» degen áńgimeler kóp. Burynǵy keńesshi Ertisbaev suhbatynda «Qurmetti Qasym-Jomart Kemeluly, Stalın bolyńyz» dep aıǵaılap tur. Maǵan «bárin jumystan bosatyńyz, ketirińiz» deıdi. Biraq aınalyp kelgende báriń de osyǵan ıtermelep turǵan joqsyńdar ma!? Men qazir jalǵyz Almaty týraly ǵana emes, búkil oblys ákimderi men mınıstrler týraly aıtyp otyrmyn. Almaty biraq eń úlken qala. Ondaǵy jaǵdaı búkil eldegi ahýaldy kórsetedi», - dedi ol.
