Geologııany tsıfrlandyrý: Qazaqstan JI arqyly ken barlaý tıimdiligin arttyrmaq
ASTANA. KAZINFORM – Úkimette Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıevtiń tóraǵalyǵymen geologııa salasyna jasandy ıntellekt tehnologııalaryn engizý máseleleri talqylandy.
Keńeske Ónerkásip jáne qurylys mınıstri Ersaıyn Naǵaspaev, ulttyq IT-holdıngterdiń ókilderi, sondaı-aq halyqaralyq jáne otandyq tehnologııalyq kompanııalardyń sarapshylary qatysty.
Jıyn barysynda jer qoınaýyn paıdalanýǵa zııatkerlik sheshimderdi engizý jumystary Qasym-Jomart Toqaevtyń geologııany jedel tsıfrlandyrý jáne ónerkásipte joǵary tehnologııalyq ekojúıe qalyptastyrý jónindegi tapsyrmasy aıasynda júrgizilip jatqany atap ótildi.
Joba elimizdegi geologııalyq derekterdiń keminde 90%-yn qamtıtyn biryńǵaı tsıfrlyq platformany damytýǵa baǵyttalǵan. Ol Big Data, mashınalyq kórý jáne predıktıvti analıtıka tehnologııalaryn biriktiredi.
Keńes barysynda EPAM Kazakhstan ókilderi derekterdi óńdeý jáne saqtaý júıelerin ázirleý barysy týraly baıandady. Qazirgi ýaqytta 1 terabaıttan astam derek óńdelip, jasandy ıntellekt sheshiminiń prototıpi iske qosylǵan.
Al Terra GeoCube kompanııasy jerseriktik derekter men tarıhı materıaldardy taldaý arqyly geologııalyq barlaý úshin perspektıvaly aımaqtardy anyqtaıtyn «GeoCube» modelin tanystyrdy. Bul sheshim dalalyq shyǵyndardy azaıtyp, jańa ken oryndaryn tabý yqtımaldyǵyn arttyrýǵa múmkindik beredi.
Qatysýshylar ınfraqurylym máselelerine de nazar aýdardy. Jınalǵan 500 terabaıt derekti óńdeý úshin baılanys arnalaryn 25 Gbıt/s deıin jańǵyrtý jáne Alem.cloud bazasynda qosymsha qýat kózderin bólý qajettigi aıtyldy. Ulttyq aqparattyq tehnologııalar AQ-ǵa jobany qajetti resýrstarmen, onyń ishinde grafıkalyq protsessorlarmen jáne 2 petabaıtqa deıingi saqtaý júıesimen qamtamasyz etý tapsyryldy.
Jaslan Mádıev bul bastamanyń strategııalyq mańyzyn atap ótti.
«Geologııada jasandy ıntellektini qoldaný – tek avtomattandyrý emes, resýrstardy izdeý ýaqytyn birneshe ese qysqartyp, ınvestorlar úshin protsesterdiń ashyqtyǵyn arttyratyn naqty ekonomıkalyq qural», – dedi ol.
Keńes qorytyndysy boıynsha Astana Hub-qa 2026 jyldyń 1 maýsymyna deıin jobaǵa qatysty barlyq kelisimderdi jedeldetý tapsyryldy. Al jergilikti atqarýshy organdar men salalyq vedomstvolarǵa jer qoınaýyn paıdalanýǵa qatysty ózekti derekterdi ýaqtyly usyný mindetteldi.
Aıta keteıik, «QazMunaıGaz» ben Turkish Petroleum Corporation geologııalyq barlaý jáne óndiris salasynda yntymaqtaspaq.
