Almaty gúlzarlaryna orkestrdiń súıemeldeýimen ótetin mýzykalyq keshter qaıta oraldy

ALMATY. Mamyrdyń 14-i. QazAqparat /Erbol Azanbek/ - Almatyda Uly Jeńistiń 65 jyldyǵyna arnalǵan sharalar jalǵasýda. Búgin Panfılov pen Tóle bı kósheleriniń qıylysyndaǵy gúlzarda «Qalalyq baqta úrlemeli orkestr oınaıdy» atty kesh ótti,

dep habarlaıdy QazAqparat.

Sharanyń uıymdastyrýshysy Almaly aýdanynyń ákimdigi ókilderiniń aıtýynsha, bul sharany uıymdastyrýda Almaty gúlzarlarynda mýzykalyq keshter ótkizý dástúrin qaıta qolǵa alý, ardagerlerdiń kóńilin kóterý maqsat bolǵan. Aýdan ákimi Marat Pirinbekovtyń aıtýynsha, bundaı keshter turǵyndardyń kóńil-kúıin kóterip, eski dástúrlerdi oraltady. Búgingi keshte Ǵ.Jubanova atyndaǵy mektep-ınternattyń eń úzdik oqýshylarynan quralǵan orkestr tek ardagerler úshin soǵys jyldaryndaǵy áýenderdi oryndady.

«Bundaı keshter jastyqty eske túsiredi. Keńes odaǵy tusynda Almaty gúlzarlarynda osyndaı mýzykalyq keshter jıi ótetin. Al qaıta qolǵa alynǵan bul shara bıyl 5-shi ret ótkizilip tur. Biz ár juma saıyn osyndaı shara ótip tursa deımiz. Sońǵy kezde bul sharaǵa jastar da kelip júr. Sondyqtan bundaı sharanyń ótýi qajet», deıdi Almaly aýdandyq ardagerler uıymy mádenıet komıtetiniń tóraıymy, eńbek ardageri Merýert Tynybekova.