Almaty gazdandyrý boıynsha elimizde birinshi orynda tur
ALMATY. QazAqparat- Búgingi tańda Almaty qalasy gazdandyrý deńgeıi boıynsha elimizde birinshi orynda. Shamamen 2 mln turǵyn tabıǵı gazǵa qol jetkizgen, dep habarlaıdy QazAqparat tilshisi.
Qalany gazdandyrý «QazTransGaz Aımaq» Almaty óndiristik fılıalynyń ınvestıtsııalyq baǵdarlamasy sheńberinde júzege asyrylyp jatyr.
«2017-2021 jyldarǵa arnalǵan ınvestıtsııalyq baǵdarlama sheńberinde 12 mlrd teńge qarjylandyrý somasyna 265 km gaz qubyry salyndy, 114,4 km qoldanystaǵy gaz qubyry rekonstrýktsııalandy, 40 shkaftyq gaz retteý pýnkti, 3 gaz retteý blok pýnkti jáne 63 birlik elektr-hımııalyq qorǵaý stantsııalary ornatyldy»,- dedi brıfıng barysynda QR Energetıka mınıstri Bolat Aqsholaqov.
Mınıstrdiń aıtýynsha, bul sharalar senimdi tasymaldaýdy qamtamasyz etip qana qoımaı, 4 myń jańa abonentti gazben qamtýǵa múmkindik berdi. 2022 jyldyń 1 qańtarynan beri 2124 úı qosyldy, bul qalanyń ekologııalyq jaǵdaıyn jaqsartýǵa oń áserin tıgizýde.
«2022-2026 jyldarǵa arnalǵan jańa ınvestıtsııalyq baǵdarlama 15,2 mlrd teńge mólsherinde bekitildi. Investıtsııalyq baǵdarlama: - uzyndyǵy 158 shaqyrym gaz qubyrlaryn rekonstrýktsııalaýǵa; - qosymsha 355 abonentti gazben qamtamasyz etý úshin uzyndyǵy 113 shaqyrym jańa jeliler salýǵa; - 111 birlik elektr-hımııalyq qorǵaý stantsııalaryn jáne 53 birlik shkaftyq gaz retteý pýnktterin rekonstrýktsııalaýǵa baǵyttalǵan», - deıdi mınıstr.
