Almaty fontanynda toq soǵý oqıǵasy: Bir naýqastyń jaǵdaıy óte aýyr
ALMATY. QazAqparat - Almaty tsırkiniń janyndaǵy sýburqaqta toq soqqan úsh adamnyń biriniń jaǵdaıy óte aýyr. Bul týraly qalalyq Qoǵamdyq densaýlyq basqarmasy basshysynyń orynbasary Laýra Myrzaǵalı málim etti, dep habarlaıdy QazAqparat tilshisi.
«Senbi kúni keshki saǵat 16:00 shamasynda jedel járdem qyzmetine sýburqaqta bir eresek jáne eki balanyń zardap shekkeni týraly habar tústi. 1993 jyly týǵan Almaty turǵyny qazir Ortalyq klınkalyq aýrýhanada jatyr. Jaǵdaıy óte aýyr. Reanımatsııa bóliminde. Barlyq medıtsınalyq kómekti kórsetip jatyrmyz. Ol azamatta kóptegen jaraqat bar. Qazir dárigerlerdiń baqylaýynda. Qalǵan eki kishkentaı qyzǵa keletin bolsaq, 10 jastaǵy qyz jansaqtaý bóliminen palataǵa aýystyryldy. Jaǵdaıy ortasha aýyr. 8 jastaǵy ekinshi qyz jansaqtaý bóliminde, erteńge deıin baqylaýda ustaımyz. Jaǵdaıy ortasha aýyr», - dedi basqarma ókili.
Eske salaıyq, 19 maýsym kúni Almaty tsırki mańyndaǵy fontanda birneshe adamdy toq soqty.
Keıin ákimdik atalǵan oqıǵanyn mán-jaıyn túsindirdi.
Sonymen qatar, «Eco Almaty» JShS basshysy Janna Asanova, ol jerde «Shomylýǵa tyıym salynady!» degen eskertý taqtashasy ornatylǵanyn jazdy.
Almaty ákimi Baqytjan Saǵyntaevtyń aıtýynsha, oqys oqıǵaǵa qatysty polıtsııa tergeý júrgizip jatyr.
