Almaty Film Festival-ǵa tanymal kınematografshylardan kimder keledi

Almaty Film Festival 15-19 qyrkúıek kúnderi aralyǵynda ótedi.

Arnaıy ótkizilgen baspasóz máslıhatynda uıymdastyrýshylar jobanyń Kann, Pýsan kınofestıvalderi tájirıbesine súıenip jasalǵanyn atap ótti. Olar eń aldymen, kınoındýstrııanyń has mamandary men týrısterdi tartýǵa baǵyttalǵan.

Budan ózge, baspasóz jıynynda juldyzdy qonaqtardyń tizimi jarııa etildi.  Sondaı-aq «Eýrazııa» Halyqaralyq kınofestıvali Astanaǵa aýysqannan keıin Almatyǵa tól festıvaldiń ne úshin qajet bolǵany aıtyldy.

«Bizdiń festıval otandyq kınony damytý men talanttardy qoldaý turǵysynan Pýsan kınofestıvaline uqsas. Biraq olardyń baǵdarlamalary óte aýqymdy jáne kóptegen halyqaralyq fılmder kórsetiledi. Ózderiniń kınolaryn kórsetýge arnalǵan sektsııalar da bar. Biz de osy formatty engizdik. Pýsan kınofestıvali kınoındýstrııa  kásipqoılaryn shaqyrady. Olarmen seriktestik quryp,  birge ónim shyǵarady. Demek biz de  álemge áıgili, «A» sanatyndaǵy akterlardy ǵana emes, kınorejısserlardy, prodıýserler men stsenarııshilerdi shaqyramyz. Olarmen tájirıbe almasyp, bolashaqta birge jumys jasaýǵa kelisemiz», - dedi Almaty Film Festival bas prodıýseri Ernar Qurmashev.

Onyń aıtýynsha, festıval qonaqtary, ıaǵnı kınoındýstrııadaǵy yqpaldy azamattar otandyq  kınematografshylarmen tájirıbe bólisetin bolady.  

«Alekseı Petrýhın Qytaımen birlesken ónimi týraly pikirin ortaǵa salady. Bizdi ásirese ózge eldermen birlesken jobalar qyzyqtyrady. Mundaı fılm qatarynan eki elde kórsetiletindikten kóbirek paıda ákeledi. Bizdiń elde fızıkalyq turǵyda kassa jınaý múmkin emes. Bul úshin ishki daıyndyǵymyzdy durystap, kınomádenıetimizdi bir izge qoıýymyz kerek. Sonda álemdik kınematografshylardyń qyzyǵýshylyǵyn oıatamyz. Al ol úshin osyndaı festıval aýadaı qajet», -deıdi Ernar Qurmashev.

Konkýrsqa túsetitin, konkýrstan tys ótetin fılmderdi halyq tegin tamashalaı alady. Aldymen kınozalǵa tirkeýden ótken qonaqtar kirgizilip, qalǵan bos oryndarǵa kelýshiler ornalasa alady.

Fılmder Lumiera cinema jáne Cinemax Dostyk Plaza kınoteatrlarynda ótedi.  Uıymdastyrýshylardyń aıtýynsha, qala turǵyndary men qonaqtary sapaly kınoǵa qaryq bolmaq. 

«Disney-diń TMD elderi boıynsha dırektory Marııa Ozkan-Jıgalova keledi. Bul sektsııany «Korol Lev» klassıkalyq mýltfılmimen ashamyz. Mýltfılm rejısseri Rob Mınkoff qyzyl kilemmen júrip ótedi. Sondaı-aq 16 qyrkúıekte eki taqyrypta sheberlik sabaǵyn ótkizedi.

Belgili koreılik kınorejısser Kım Kı Dýk te festıvalǵa qonaq bolady.  Onyń sońǵy kartınasyn kórermenge usynamyz. Kórsetilimnen soń onymen  áńgimelesýge  múmkindik týady. Ing Bergmannyń 100 jyldyǵyna oraı oǵan arnalǵan fılmdi kórsetemiz. Onyń tusaýy Kann festıvalinde kesilgen bolatyn. Nastasıa Kınskıdiń  úzdik jumystarynyń biri Vım Venderstiń «Parıj, Tehas» kartınasyn aktrısamen birge tamashalaý buıyryp otyr.

Aktrısa jergilikti  halyqpen jáne BAQ ókilderimen pikir almasqysy keledi. Budan ózge, qazylar alqasy músheleri de kórermenmen kezdesý ótkizedi», - dedi festıvaldiń baǵdarlama dırektory Elena Larıonova.

Festıvalge 5 adamnan turatyn halyqaralyq qazylar alqasy tórelik etedi. Olardyń arasynda «Aıka» fılminiń prodıýseri Gúlnár Sársenova, belgili aktrısa Nastasıa Kınskı, «Sýpermen», «Trı mýshketera» fılmderiniń prodıýseri Kır Spengler, frantsýzdyq prodıýser Mark Rýskar bar. Qazylardyń tóraǵasy -  reseılik rejısser Sergeı Bodrov.

Konkýrs  5 nomınatsııa boıynsha ótedi.  Árbir atalym boıynsha aqshalaı syılyqtar tabystalady. Atap aıtsaq, gran-prı ıesi  - 3 mıllıon teńge, úzdik rejısser - 2 mıllıon teńge, úzdik akter men aktrısa jáne qazylardyń arnaıy syılyǵyn jeńip alǵandarǵa 1 mıllıon teńgeden buıyrady.

Kınofestıval prezıdenti Aqan Sataev festıval atalǵan maqsattardan bólek, qala úshin ımıdjdik shara bolyp tabylatynyn aıtty. Sonymen qatar negizgi nıet - Qazaqstan kınoındýstrııasyna ımıdjdik jobalardy tartý men Almatynyń tanymaldylyǵyn arttyrý.