Almaty festıvali: Túrli ult ókilderi qazaqtyń mýzyka aspaptarynda oınady

ALMATY. QazAqparat - Qazaqtyń ulttyq aspaptaryn jetik meńgerip, memlekettik tilde erkin sóıleıtin ult ókilderi Almatyda ótken «Ónerimiz saǵan – Qazaqstan!» atty mýzyka festıvalinde óner kórsetti, dep habarlaıdy QazAqparat.

Mádenıet jáne sport mınıstrliginiń baspasóz qyzmetinen málim etkendeı, Jambyl atyndaǵy Qazaq memlekettik fılarmonııasynyń sahnasynda Oleg Nıkıtın dombyrada Qurmanǵazynyń «Adaı» kúıin, Babek Iyldyrym qobyzda «Qarakemer» kúıin oryndady. Denıs ıAkovlev halyq áni «Eki jırendi», opera ánshisi Angelına ıÝgaı «Qýanamyn» ánin, Roksana Qurbanova halyq áni «Arman-aıdy» kórermenderdiń erekshe qoshemetine bólene otyryp oryndady. Sondaı-aq basqa da artıster tamasha óner kórsetti.

Kontserttik baǵdarlama Igor Blagodarnyıdyń oryndaýyndaǵy «Atameken» ánimen aıaqtaldy.

«Іs-sharanyń negizgi maqsaty – Qazaqstanda turatyn etnıkalyq toptar arasynda qazaq halqynyń óneri men mádenıetin jan-jaqty nasıhattaý, oryndaýshylardyń kásibı sheberligin arttyrý», - delingen mınıstrlik habarlamasynda.