Almaty eriktileri qarttar úıi men balalar úıiniń birligin arttyrmaq

Joba uıymdastyrýshysy Elchın Hamedovtyń aıtýynsha, kezdesý qaıyrymdylyq maqsatqa jaıylǵan dastarhan aıasynda ótip, mádenı, zııatkerlik qoıylymdar sahnalanǵan.

«Elimizde balalar úıi men qarttar úıine qamqorlyq jasaıtyn erikti qozǵalystar kóp. Degenmen, eki segmentti bir shańyraq astyna biriktiretindeı platforma joq. Jobamyzdyń maqsaty bir rettik aktsııamen shektelý emes, óz tájirıbemizdi Qazaqstannyń barlyq óńirlerine taratsaq deımiz. Balalar úıi men qarttar úıinde ótetin sharalar bólek-bólek uıymdastyrylmaı, birge ótkizilýi kerek», - deıdi Elchın Hamedov.

Onyń aıtýynsha, balalarǵa da, qarııalarǵa da únemi qoǵam nazary jetispeı jatady. Mundaı qamqorlyq túri Qazaqstan úshin tyń bolǵanymen, Batys elderi úshin qalypty kórinis.

«Balarǵa ylǵı da eresekterdiń nazary jetispeıdi. Kez kelgen balalar úıiniń turǵynyn áńgimege tartsańyz, ashylyp shyǵa keledi. Qarttar da dál solaı, kez kelgeni balamen sóılesýge qumar. Bul qajettilikterdi bir arnaǵa burýǵa bolady», - deıdi joba avtory.

Erekshe formattaǵy sharaǵa uıymdastyrýshylardan bólek 50 adam qatysty. Sharanyń qanshalyqty tıimdi bolǵanyn arnaıy shaqyrylǵan psıhologtar keıin jazbasha baǵalap, qorytyndy shyǵarady. Qarttar úıiniń bir turǵyny Tatıana Nadeına kezinde 10 jyl boıy balalar úıinde jumys istepti.

«Bul kezdesý eki býynǵa da paıdaly. Ózim 10 jyl jumys istegen balalar úıin tek atynan ǵana tanydym. Qyzdardyń biri meni tanyp qoıdy. Tanıtyn jóni de bar. Ómirimniń eleýli bóligi sonda ótken edi. Uıymdastyrýshylarǵa rahmet. Balalardyń psıhologııasyn jaqsy bilgendikten, bul kezdesýdiń olarǵa óte paıdaly ekenin sezip otyrmyn. Bizge de ol artyq bolmaıdy», - deıdi Tatıana Nadeına.

Kezdesý barysynda «Januıa» balalar úıi men qarttar úıiniń dırektorlary áriptestik jóninde memorandýmǵa otyratyn boldy. Al eriktiler arasynda aktsııa jarııalanyp, barlyq óńirler oǵan atsalysýy tıis. Respýblıkanyń ár óńirinde osyndaı kezdesýler ótkizilip, egde býyn men balǵyn býynnyń arasyndaǵy sabaqtastyqqa jol ashylmaq.