Almaty emhanalarynda stomatologııalyq kómek qalaı kórsetiledi

ALMATY. QazAqparat - Almatydaǵy №11 qalalyq emhananyń bas dárigeri Maıra Júnisova megapolıs emhanalarynda stomatologııalyq kómekti kimge jáne qalaı alýǵa bolatynyn aıtty, dep habarlaıdy QazAqparat tilshisi.

Dárigerdiń sózinshe, 18 jasqa deıingi balalar men júkti áıelder emhanada MÁMS paketinde josparly túrde tegin stomatologııalyq qyzmetterdi ala alady. Olar úshin anestezııa, jaqtyń nemese tistiń rentgenografııasy, tisti julý, preparattaý jáne plomba salý, perıostotomııa, pýlpıt, perıodontıt, stomatıttiń, alveolıttiń ótkir túrlerin emdeý, abstsessti ashý sııaqty qyzmetteri kórsetiledi.

Sondaı-aq ol MÁMS paketinde shuǵyl stomatologııalyq qyzmetterdi alýǵa bolatynyn jetkizdi. Ony 18 jasqa deıingi balalar, júkti áıelder, UOS qatysýshylary jáne olarǵa teńestirilgen adamdar, I, II, III toptaǵy múgedekter, «Altyn alqa» jáne «Kúmis alqamen» marapattalǵan kópbalaly analar, ataýly áleýmettik kómek alýshylar, jasy boıynsha zeınetke shyqqandar, ınfektsııalyq jáne áleýmettik mańyzy bar aýrýlarmen aýyratyn jáne erekshe qajettilikteri bar balaǵa nemese I toptaǵy múgedek balaǵa kútim jasaıtyndar, jumys istemeıtin qazaqstandyqtar talap ete alady.

«Mysaly, bizdiń emhanada tildiń frenýlýmy plastıkasy, joǵarǵy jáne tómengi erinniń frenýlýmyn bekitý anomalııasy, tisterdi julý, ótkir tisterdi, ashý jaq-bet aımaǵynyń ótkir, irińdi qabyný aýrýlaryn ashý sııaqty hırýrgııalyq stomatologııalyq aralasýlar jergilikti anestezııamen júrgiziledi. Osy is-sharalardyń barlyǵyn ótkizý úshin bizde tutas stomatologııalyq bólimshe bar, onda 15-ke jýyq maman jumys isteıdi ári bólimshe barlyq qajetti qymbat qural-jabdyqpen qamtamasyz etilgen. Mamanǵa barý úshin emhananyń qabyldaý bólimine habarlasyp, qabyldaýǵa jazylý kerek», - dep atap ótti Maıra Júnisova.

Esterińizge sala keteıik, emhana MÁMS aıasynda halyqqa medıtsınalyq qyzmet kórsetý ortalyǵy.