Almaty emhanalarynda 22 myńnan astam shetel azamaty tirkelgen
«Eger shetel azamaty Qazaqstan Respýblıkasynyń aýmaǵynda turaqty turatyn bolsa nemese turýǵa yqtııarhaty bolsa, ol mindetti medıtsınalyq saqtandyrý júıesi jáne medıtsınalyq kómektiń kepildik berilgen kólemi boıynsha kómek alýǵa quqyly. Búgingi tańda Almaty qalasynyń emhanalaryna 22 myńnan astam shetel azamaty tirkelgen. Olardyń ishinde Reseı Federatsııasynyń 5 myńnan astam azamaty bar», - dedi Respýblıkalyq elektrondy densaýlyq saqtaý ortalyǵy Almaty qalalyq fılıalynyń dırektory Gúlnár Ysqaqova óńirlik kommýnıkatsııalar qyzmetiniń brıfınginde.
Aıtýynsha, ótken jyldyń 15 tamyzynan bastap sheteldikter men eńbek mıgranttary úshin alǵashqy medıtsınalyq-sanıtarlyq kómek kórsetetin uıymdarǵa tirkelý erejeleri ózgergen. Endi olarda erikti medıtsınalyq saqtandyrý sharty bolýy kerek.
Aıta ketsek, Qazaqstanda 15 qyrkúıekte erkin tańdaý arqyly alǵashqy medıtsınalyq-sanıtarlyq kómek uıymdaryna tirkelý naýqany bastaldy jáne ol 15 qarashaǵa deıin jalǵasady.
«Búginde Almatyda 73 uıym alǵashqy medıtsınalyq-sanıtarlyq kómekti kórsetedi. Onyń 40-y – memlekettik, qalǵany – jekemenshik. Búgingi tańda 6 jańa tapsyrys jetkizýshi alǵashqy medıtsınalyq-sanıtarlyq kómek kórsetýge jáne tirkeýge nıet bildirdi», - dedi spıker.
Tirkelýdiń úsh múmkindigi bar: tirkelý naýqany aıasynda, erkin tańdaý jáne qonys aýdarýǵa baılanysty. Qajet bolǵan jaǵdaıda ýchaskelik dáriger kómektesip, úıde baqylap otyrýy úshin turaqty turǵylyqty jerde ornalasqan emhanany tańdaýdy usynady.
Almaty qalalyq qoǵamdyq densaýlyq saqtaý basqarmasynyń emdeý-profılaktıkalyq is-sharalar bóliminiń basshysy Láılá Imanǵalıeva naýqan barysynda alǵashqy medıtsınalyq-saraptamalyq kómek uıymyna tirkelgen azamattar tek 2023 jyldyń 1 qańtarynan bastap medıtsınalyq kómek ala bastaıtynyn aıtty. Demek, 31 jeltoqsanǵa deıin olarǵa buǵan deıin tirkelgen emhanada qyzmet kórsetý jalǵasady.
