Almaty emhanalaryna jańadan 70 maman jumysqa qabyldandy
ALMATY. QazAqparat - Almatydaǵy medıtsınalyq mekemeler jańa mamandarmen tolyǵatyn boldy. Olardyń arasynda salalyq mamandyq ıeleri men alǵashqy medıtsınalyq kómek kórsetý júıesine beıimdelgen mamandar bar. Bul týraly qalalyq densaýlyq saqtaý basqarmasynyń baspasóz qyzmeti habarlady.
Qazaq medıtsınalyq úzdiksiz bilim berý ýnıversıtetiniń (QazMÚBBÝ) 67 túlegi men 3 magıstratýra túlegi qalalyq emhanalardaǵy mamandar tapshylyǵyn joıatyn boldy.
67 mamannyń 46-sy alǵashqy medıtsınalyq-sanıtarlyq kómek salasyna baǵyttalsa, qalǵany - medıtsınalyq ortalyqtarda, perzenthanalar men jedel járdem stansasyna ornalasatyn bolady.
Bul mamandar klınıkalyq farmakologııa, kardıologııa, júıke júıesi aýrýlary, allergologııa men ımmýnologııa, jansyzdandyrý men jan saqtaý, kóz, akýsher-gınekolog, neonatolog, psıhıatr, ýrolog pen androlog, otorınolarıngolog, travmatolog-ortoped, balalar hırýrgy, endokrınolog, sáýlelik dıagnostıka salasynda qyzmet etetin bolady.
QazMÚBBÝ úsh túlegi qalalyq emhanalarǵa bet-jaq hırýrgy, nevropatolog, neırohırýrg bolyp jumysqa ornalasady.
Esterińizge sala keteıik, ótken aptada Almatyǵa sapary barysynda QR Premer-mınıstriniń orynbasary Gúlshara Ábdiqalyqova medıtsına salasyndaǵy maman tapshylyǵyn basa aıtyp, medıtsınalyq JOO túlekteriniń jumys tabýda qıyndyqqa tap bolatynyn eskertken bolatyn.
Qalalyq densaýlyq saqtaý basqarmasy men QazMÚBBÝ medıtsınalyq mamandardyń jumyspen qamtylýy úshin kóp jumys atqaryp keledi. Endigi kezekte osy baǵyttaǵy jumys odan ári jandana túspek.
