Almaty emhanalary koronavırýstyń ekinshi tolqynyna daıyndyqty bastady
«Pandemııa bastalǵannan beri qaýipti vırýsty juqtyrǵan naýqastardyń basym bóligi búginde saýyǵyp, úılerine aman-esen oraldy. Demek, bizdiń elde koronavırýstyq ınfektsııamen kúrestiń durys joly tańdaldy. Sonymen qatar, álemde aýrýdyń kúrt ósýi baıqalady. Іndettiń ekinshi tolqyny bastaldy. Atap aıtqanda, Italııa, Ispanııa, Germanııa, Túrkııa jáne Ońtústik Koreıa sııaqty elderde. TMD elderinde vırýstyń taraýy Qazaqstanǵa qaraǵanda joǵary. Osy jaǵdaıdy eskere otyryp, Qazaqstan, barlyq elder sııaqty, onyń ishinde bizdiń emhanamyz da koronavırýs ınfektsııanyń bolýy múmkin ekinshi tolqynyna daıyn bolýy kerek»,– deıdi dáriger.
Onyń aıtýynsha, №2 qalalyq emhananyń bas ǵımaratynan bólek 3 fılıaly bar. Olar qala boıynsha 64 454 astam turǵynǵa qyzmet kórsetedi. «Dýman» yqshamaýdanynda 12 myńdaı adamdy qabyldaıtyn jáne «Sulýsaı», «Keńsaı» yshqamaýdandarynda bólimsheleri bar. Emhana sanıtarlyq normalarǵa saı jumys istep jatyr.
«Emhananyń qyzmeti barlyq sanıtarlyq-epıdemıologııalyq sharalardy saqtaı otyryp, bekitilgen normatıvtik-quqyqtyq aktilerge sáıkes júzege asyrylady. Kireberiste jylý baqylaý qurylǵysy ornatylǵan, ony arnaıy maman baqylaıdy. Naýqastardy qabyldaý qatań túrde aldyn ala jazylý arqyly júzege asyrylady. Sanıtarlyq tazartqyshtar emhanaǵa kire beriste, dálizderde, baspaldaq alańdarynda ornatylǵan. Kelýshilerdiń áleýmettik araqashyqtyǵyn jáne qozǵalys baǵytyn qamtamasyz etý úshin eden belgileri men qorshaýlar ornalastyrylǵan. Emhana «las» jáne «taza» aımaqtarǵa bólingen. Qyzmetkerler men naýqastar úshin bólek kireberister bar»,– deıdi spıker.
Sonymen qatar, ol koronavırýs ınfektsııasynyń sharyqtaý kezeńinde emhanada 12 mobıldi top jumys istegenin tilge tıek etti.
«Bizdiń emhanada COVID-19 aýrýynyń eń joǵary deńgeıinde 12 mobıldi top jumys istedi. Mobıldi top quramyna 1 jalpy tájirıbe dárigeri, 1 medbıke, 1 laborant, 1 psıholog, 1 áleýmettik qyzmetker kirdi. Qazir emhanadaǵy jaǵdaı turaqty, dárigerlerdiń baqylaýynda koronavıýrs juqtyrǵan úsh naýqas qana bar. Sondyqtan 5 mobıldi top jumys istep jatyr. Oǵan qosa koll-ortalyq iske qosylǵan. Mobıldi toptyń is-qımyl algorıtmi kelesideı: Sall-ortalyqqa qońyraý tússe, nemese naýqas emhanaǵa júginse, qońyraý mobıldi topqa aýysady, ol COVID-19 -ǵa kúdiktini jaǵdaıdy tekserý paraǵy boıynsha anyqtaıdy, qajet bolǵan jaǵdaıda shaqyrtýǵa barady, oqshaýlaý sharttaryn anyqtaıdy, qajet bolsa ımpýlstik oksımetrlermen jáne dári-dármektermen qamtamasyz etedi, táýlik boıǵy statsıonarǵa gospıtalızatsııalaý úshin COVID-19 koronavırýstyq ınfektsııasy bar naýqastyń jaǵdaıyn ýaqtyly baǵalaıdy.
Olar ýchaskelik dárigerge nemese meıirbıkege patsıentti qaraý nátıjeleri týraly habarlaıdy, qajet bolǵan jaǵdaıda emdeý josparyn túzete otyryp, olarǵa odan ári qashyqtyqtan baqylaý júrgizý úshin aqparatty jáne medıtsınalyq qujattardy beredi»,-deıdi ol.
Sonymen qatar, ol aldaǵy kúz, qys, kóktem aılarynda ınfektsııanyń jańa tolqyny bolýy múmkin degen boljam jasalǵanyn aıtty. Bul kezde ádettegideı sýyq tııý, bakterıaldy ınfektsııa, tumaý men pnevmonııa aýrlary beleń alatyn kórinedi.
«Pandemııaǵa baılanysty osy aralyq qaýipti bolýy múmkin. Sondyqtan barlyq medıtsınalyq uıymdarda daıyndyq jumystary júrgizilip, tumaýdyń aldyna alý boıynsha ekpe salynýda. Ol birinshiden osal toptarǵa salynady, olar jıi aýyratyn 18 jasqa deıingi balalar, sozylmaly aýrýy bar tulǵalar, júkti áıelder, 60 jastan asqan eresekter, sonymen qatar balalar úıi, qarttar úıiniń turǵyndary bar»,-deıdi Nurııa Qalmuratova.
Koronavırýstyń ekinshi tolqynyna daıyndyq barysynda maýsym aıynyń 15-i men shildeniń 15 aralyǵyndaǵy jaǵdaıǵa monıtorıng jasalǵan. Osy aralyqta koronavırýspen aýyrǵandar eń kóp tirkelgen.
«Mundaı monıtorıngtiń paıdasyna kelsek, ol qajet kezinde qansha kadr tartý kerektigin jáne negizgi dári-dármek qoryn jasaýǵa múmkindik beredi. Sondaı-aq koronavırýs aýrýy kezinde áreket etý algorıtmi ázirlendi. Oǵan qosa koronavırýs aýrýynyń aldyn alý jónindegi aqparattyq eskertpelerdi taratyp jatyrmyz»,-deıdi N.Qalmuratova.
