Almaty elimizdegi 7-Qysqy Azııa oıyndarynyń alaýy tutanǵan alǵashqy qala - qala ákimi
ALMATY. 12 qańtar. QazAqparat- /Ádilet Musahaev/ - Alda bolatyn Azıadanyń alaýyn jaǵý rásimi Ál-Kýáıt qalasynda óte joǵary deńgeıde ótti.
Bul jaıynda QR Sport jáne týrızm mınıstri Temirhan Dosmuhambetov Almatydaǵy halyqaralyq áýejaıdan 7-Qysqy Azııa oıyndarynyń alaýyn qarsy alý kezinde aıtty.
"Qazaqstanda Azıada alaýyn alyp júrý sherýi tuńǵysh ret júrgizilmek. Onyń maqsaty - sport pen salamatty ómir saltyn nasıhattaý bolyp tabylady", -deıdi mınıstr.
Almaty qalasynyń ákimi Ahmetjan Esimov alaý sherýiniń ótýi elimiz úshin úlken abyroı ekendigin aıta kele, osydan tórt jyl buryn osy iri jarysty ótkizý mártebesin bizdiń qalamyzdyń jeńip alǵandyǵyn maqtanyshpen aıtty. Sondaı-aq ol 2011 jylǵy qysqy Azııa oıyndarynyń alaýy elimiz boıynsha Almaty qalasynda alǵash tutanatyndyǵyn jetkizdi.
Ákim men mınıstr alda tartysty doda kútip turǵanyn jáne onda qazaqstandyqtardyń laıyqty óner kórsetetinin aıtty.
Azıada alaýy keshke Taraz qalasyna jol tartyp, odan ári elimizdiń barlyq oblys ortalyqtaryn aralaıdy. Ol 30 qańtar kúni 7-Qysqy Azııa oıyndarynyń saltanatty ashylýy ótetin elimizdiń bas qalasy - Astanada turaqtaıdy.
