Almaty ekonomıkasy jylyna 5 paıyz ósim kórsetýi kerek – Saǵyntaev
ALMATY. QazAqparat – Baqytjan Saǵyntaev Almatyny álemdik 100 úzdik qalanyń qataryna engizý úshin ne isteý kerektigin aıtty, dep habarlaıdy QazAqparat tilshisi.
«Búgingi forým tarıhı sátpen tuspa tus kelip otyr. Bıyl Almaty qalasynyń aldaǵy 30 jylda damý baǵdary jasalyp jatyr. 2050 jylǵa deıingi damý strategııasy qalalyqtardyń talqylaýyna shyǵaryldy. Basty maqsat - bıznes múmkindikter jaǵynan da, ómir súrý sapasy jaǵynan da álemdik úzdik 100 qalanyń qataryna ený. Bul úshin myqty ekonomıkalyq negiz kerek. Qala ekonomıkasy jylyna 5 paıyz ósim kórsetetin qarqynmen damýy kerek», - dedi Baqytjan Saǵyntaev Almaty Investment Forum aıasynda ótken jıynda.
Onyń aıtýynsha, mundaı ósimge qol jetkizý úshin qala bıligi ekonomıkany tereńnen reformalaýǵa kóshpek.
«Almatynyń damý strategııasyn jasaı otyryp, biz basqa elderdiń tájirıbesin zerttedik. Nege álemdegi keıbir qalalar alǵa umtylyp, ósip-órlep, baıyp jatyr? Nege keıbir qalalar kedeıshilikke urynyp jatyr? San-Frantsısko qalasynyń júrip ótken joly tań qaldyrdy. Bul qaladaǵy jan basyna shaqqandaǵy tabys amerıkandyq eń kedeı aımaqtaǵy jan basyna shaqqandaǵy tabystan 3 ese artyq. San-Frantsısko bıligi qandaı jumys jasady? Adamdarǵa qolaıly ómir súrý klımatyn negizge ala otyryp yńǵaıly orta, yńǵaıly ınfraqurylym jasaldy. Bul jerde AQSh-taǵy eń úzdik bıznes klımat jasaldy. Sonymen qatar, qalanyń ekonomıkasynda jańa ındýstııalyq jobalar jasaldy», - dedi ákim.
Qala basshysy Búkilálemdik bank reıtıngi boıynsha Almaty Qazaqstan óńirleriniń ishinde eń úzdik ınvestklımat qalyptasqan qala ekenin aıtty.
Bıyl qyrkúıekte Fitch agenttigi Almatyǵa VVV reıtıngin usyndy.
