Almaty ekonomıkasy 4 aıdyń ishinde 9,2 paıyzǵa tómendegen
ALMATY. QazAqparat – Almatyda ekonomıkanyń qaı salasynda tómendeý bolǵany belgili boldy. Bul týraly qala ákimi Baqytjan Saǵyntaev onlaın brıfıng kezinde aıtty, dep habarlaıdy QazAqparat tilshisi.
Almaty qalasynyń 2020 jylǵy qańtar-sáýir aılaryndaǵy ekonomıkalyq kórsetkishi byltyrǵymen salystyrǵanda 9,2 paıyzǵa tómendegen.
«Qalada jalpy ekonomıkalyq kórsetkish 9,2 paıyzǵa, ınvestıtsııa 8,6 paıyzǵa kemigen. Inflıatsııa byltyrǵymen salystyrǵanda 3,4 paıyzǵa ósken. Ásirese saýda jáne kólik tasymaly salasy kóbirek zardap shekti», - dedi B. Saǵyntaev.
Onyń aıtýynsha, sońǵy 5 aıda 174 mlrd teńge salyq túsken. Qańtar, aqpan, naýryz aılarynda salyq túsimi + kórsetip tursa, sáýir aıynda – 3,3 mlrd teńge, mamyrda 10,8 mlrd teńge shyǵyn keltirildi.
«Osy oraıda barlyq kásipkerlik sýbektilerinde barynsha jumys ornyn saqtap qalý kózdelip otyr. Sonymen qatar, olardy pandemııa ahýalynda jumys isteýge beıimdeýge týra keledi», - dedi ákim.
