Almaty ekonomıkasy 3,2% ósti
ALMATY. QazAqparat - Almatyda barlyq áleýmettik-ekonomıkalyq kórsetkishteri boıynsha oń dınamıka qalyptasqan. Bul týraly búgingi qalalyq máslıhat sessııasynda bıýdjetti josparlaý boıynsha otyrysta aıtyldy, dep habarlaıdy QazAqparat tilshisi.
Qalalyq Ekonomıka jáne bıýdjetti josparlaý basqarmasy málimdegendeı, 10 aı ishinde ekonomıka 3,2%-ǵa ósti. Óndiris ónimin shyǵarý - 2,8%-ǵa, qurylys kólemi - 4,7%-ǵa, turǵyn úı - 21%-ǵa, ınvestıtsııa - 17,8%-ǵa artty. Qala bıýdjetine ótken jyldyń osy kezeńimen salystyrǵanda 13,7%-ǵa kóp salyq jınaldy Memlekettik qoldaý barysynda 30 myń jumys orny quryldy. Kóp jyldan beri alǵash ret jumyssyzdyq deńgeıi tómendep, 5,2%-dy qurady.
«Álemde jahandyq ózgerister bolyp jatyr, tehnologııa jedel ózgerýde. Tek megapolıster ǵana ınnovatsııa men tehnologııanyń oshaǵyna aınalyp, ınvestıtsııany tartýda. Elbasy aıtqandaı, ınvestıtsııa, ınnovatsııa, kreatıvti jandar úshin jahandyq báseke qyzyp tur. Biz Almatyny básekege qabiletti, ekonomıkalyq jaǵynan turaqty, jaıly qalaǵa aınaldyrýǵa tıispiz. Ol úshin qalada jyl saıynǵy ekonomıkalyq ósim ortasha 5% bolýy, adam basyna shaqqanda JÓÓ 15 jyl ishinde 1,5, al 30 jylda 3 ese artýy tıis. Memleket basshysynyń tapsyrmasy boıynsha «HATCH» halyqaralyq keńesshilerimen birge Almatynyń 2050 jylǵa deıingi Sheberlik jospary jasalyp, keler jyly daıyn bolady», - dedi Baýyrjan Baıbek.
Aıta ketý kerek, búgin qalalyq máslıhat sessııasynda Almatynyń 2019 jylǵy bıýdjeti naqtylanyp, 525,2 mlrd teńge mólsherinde bekitildi.
