«Almaty – Ekaterınbýrg» tas jolyndaǵy jol apatynan úsh adam qaıtys boldy

ALMATY. QazAqparat – 15 tamyz kúni «Almaty – Ekatırınbýrg» tas jolynda Qaraǵandy oblysy Shet aýdany Aqsý-Aıýly kentinen 50 shaqyrym jerde jol-kólik oqıǵasy boldy, dep habarlaıdy QazAqparat.

Qaraǵandy oblysy Polıtsııa departamentiniń málimetinshe, oqıǵa saldarynan 41 jastaǵy «Folksvagen Passat» avtokóliginiń júrgizýshisi jáne onyń eki jolaýshysy alǵan dene jaraqatynan oqıǵa orynynda qaıtys boldy. Sondaı-aq «Shevrole Kobalt» avtokóliginiń júrgizýshisi jáne eki kóliktiń jeti jolaýshysy aýrýhanaǵa jetkizildi.

Atalǵan derek boıynsha Qazaqstan Qylmystyq Kodeksiniń 345 baby 4 tarmaǵyna sáıkes qylmystyq is qozǵaldy. Tıisti saraptamalar taǵaıyndaldy.

Qaraǵandy oblystyq Polıtsııa departamenti kólik júrgizýshilerden jol júrý erejelerin qatań saqtaýǵa, jyldamdyqty shekten tys asyrmaýǵa shaqyrady.