Almaty-Ekaterınbor jol torabynda 51 adam qutqaryldy
ASTANA. QazAqparat - Sońǵy birneshe kúnde Qaraǵandy oblysynyń «Saryshaǵan» trassalyq medıtsınalyq-qutqarý pýnktiniń qyzmetkerleri 51 adamdy qaýipsiz jerge jetkizdi. Onyń 35-i Ózbekstan, al 8-i Qyrǵyzstan azamattary, dep habarlaıdy QazAqparat tilshisi.
Máselen, QR ІІM Tótenshe jaǵdaılar komıtetiniń resmı ókili Nursultan Nurahmetovtiń aıtýynsha, 2018 jylǵy 1 jeltoqsanda synǵan Gazel avtokóliginen 8 Qyrǵyzstan Respýblıkasynyń azamaty qutqaryldy jáne Saryshaǵan kentindegi demalys úıine jetkizildi.
Al 2018 jylǵy 5 jeltoqsanda saǵat tańǵy 4-de Almaty-Ekaterınbor tas jolynda ishinde 51 jolaýshysy bar avtobýstyń synǵany týraly aqparat tústi. Dalada tońyp qalǵan adamdarǵa kómek kórsetý úshin TMQP shuǵyl áreket etý brıgadasy oqıǵa ornyna jedel jetken.
Barlyq jolaýshylardy dárigerler tekserip, Saryshaǵan kentindegi temir jol vokzalynyń ǵımaratyna 35 adam jetkizilgen, júrgizýshimen birge 16 adam jaqyn jerdegi Azııa Petrol dámhanasynda qaldy.
«Árıne, eshkim kóliktiń jolda buzylýynan saqtandyrylmaǵan. Jyldyń basqa mezgilinde bir-eki nemese odan da kóp ýaqytqa deıin kómek kúte alatyn bolsa, qysta adamdar tipti avtokólikte otyrsa da tez tońyp qalady, sol sebepti dereý kómek qajet. Qazirgi ýaqytta Qazaqstannyń aýmaǵynda dál osyndaı 40 pýnkt jumys isteıdi. Olardyń uıymdastyrylǵan jumysynyń nátıjesi respýblıkalyq jol toraptaryndaǵy jol-kólik apattarynda zardap shekkenderge medıtsınalyq jáne qutqarý kómegin kórsetýge múmkindik beredi», - dedi Nursultan Nurahmetov.
Aıta keterligi, 2018 jyldyń aǵymdaǵy qysqy merziminde barlyǵy trassalyq medıtsınalyq-qutqarý pýnktteriniń shuǵyl áreket etý brıgadasynyń kúshterimen jóndeýge kelmeı qalǵan avtokólikten jáne borannan 60 jýyq adamdy qutqarǵan.
